नागपुरातील करोनाची सद्यस्थिती; एकाच दिवशी विक्रमांची नोंद

म. टा. प्रतिनिधी, नागपूरः एकाच दिवशी झालेले विक्रमी मृत्यू आणि नव्या बाधितांच्या उच्चांकी संख्येनंतर आता करोना मुक्त होणाऱ्यांनीही सोमवारी विक्रमाची नोंद केली. दिवसभरात शहरातील विविध रुग्णालयांत उपचार घेत असलेल्या सक्रिय ९७९ रुग्णांना कुठलीही लक्षणे नसल्याने रुग्णालयातून सुटी देऊन घरी पाठविण्यात आले. त्यामुळे विषाणू लागण झाल्याने आतापर्यंत करोना मुक्त होणाऱ्यांची संख्याही १२०३२ वर गेली आहे. या घडामोडीत आज दिवसभरात ३० करोना बाधितांचा मृत्यू तर नव्या ७१५ बाधितांची नोंद घेण्यात आली.

नव्याने करोनाची बाधा झालेल्या ७१५ जणांपैकी ५८५ हे शहरातील तर १२७ जण ग्रामीण भागातील आहेत. आज दिवसभरात दगावलेल्या ३० जणांपैकी २१ शहरातील ३ जिल्ह्याबाहेर तर ६ जण ग्रामीण भागातील रहिवासी होते. त्यामुळे आतापर्यंत ग्रामीण भागातून करोनामुळे मृत झालेल्यांची संख्याही १११ पर्यंग गेल्याने विषाणू प्रादुर्भावाची समुह साखळी आता ग्रामीणमध्येही पोचल्याचे सिद्ध होत आहे.

करोनाची बाधा झाल्याचे निदान झालेल्यांपैकी अँटिजन चाचणीत ३६३, खासगीतून १३४, मेयोतून ९४, मेडिकलमधून ९३ आणि निरीतून ३१ नमुन्यांचा अहवाल पॉझिटिव्ह आला. करोनाची लागण झाल्यानंतर उपचारादरम्यान दगावलेल्यांमध्ये सदरपरिसरातल्या छावणी येथील ५०, जयभीम चौक हिवरी नगर येथील ६६, जुनी मंगळवारीतील ६४, कामठीतील ५५, महाकाली नगर मानेवाडातील ६८ वर्षीय पुरुष आणि यासिन प्लॉट मोठा ताजबाग येथील ५५, खरबीतील ५३, मौदा येथील ५४ वर्षीय महिलांचा समावेश आहे.

दिवसभरात जवळजवळ ३ हजार नमुने निगेटिव्ह

जिल्ह्यातून आज दिवसभरात ३६६० संशयितांच्या घशातील स्त्राव नमुना तपासला गेला. त्यापैकी २८६७ नमुने शहरातील तर १२०६ नमुने ग्रामीण परिसरातील होते. शहरातल्या वेगवेगळ्या प्रयोगशाळांमध्ये तपासलेल्या या नमुन्यांपैकी आज २९४५ जणांचा अहवाल निगेटिव्ह आला.

दोन टक्क्यांनी वाढला करोना मुक्तीचा दर

आज दिवसभरात करोना मुक्त झालेल्या ९७९ जणांमुळे करोनामुक्तीचा दर दोन टक्क्यांनी वाढून ५६.८८ वर गेला आहे. आजार मुक्त झालेल्या १२०३२ जणांपैकी ८२३४ हे शहरातील तर ३७९८ हे ग्रामीण भागातील आहेत.

आजचे पॉझिटिव्ह- ७१५
आजचे निगेटिव्ह- २९४५
सक्रिय करोनाबाधित- ८३६०
ग्रामीणमधील सक्रिय बाधित- ६०४६