गर्लफ्रेंड रिक्षावाल्यासोबत पळून गेली; प्रेमवीराने असा घेतला 'सूड'

म. टा. प्रतिनिधी, पुणे: मनापासून प्रेम करणारी आपली प्रेयसी रिक्षा चालकाबरोबर पळून गेली. त्यामुळे प्रेमभंग झालेल्या प्रियकराने रिक्षाचालकांनाच लक्ष्य केले. त्यांचे महागडे फोन त्याने लांबवले. लष्कर पोलिसांनी या प्रेमवीर चोरट्याला अटक केली आहे. त्याने ८० हून अधिक मोबाइल चोरल्याची माहिती उघड झाली आहे.

पुण्यासह मुंबईमधील अनेक रिक्षाचालकांचे मोबाइल या चोरट्याने लंपास केले आहेत. आसिफ उर्फ भुरा शेख (वय ३७, सध्या रा. पूना कॉलेज जवळ, मूळ रा. बिहार, उत्तर प्रदेश) असे या चोरट्याचे नाव आहे. आसिफची प्रेयसी गुजरातच्या अहमदाबादमधील होती. तो सध्या पूना कॉलेजजवळ राहत होता. काही महिन्यांपूर्वी त्याच्या प्रेयसीचे एका रिक्षाचालकासोबत प्रेमसंबंध जुळले. याची माहिती आसिफला मिळण्याआधीच तिने त्या रिक्षावाल्यासोबत पळ काढला. आपली प्रेयसी एका रिक्षाचालकासोबत पळून गेली हे ऐकून आसिफला चांगलाच धक्का बसला. त्याला रिक्षाचालकांची चीड आली. त्याच रागातून त्याने रिक्षाचालकांना लक्ष्य केले. त्यांचे मोबाइल चोरण्यास सुरुवात केली, अशी माहिती पोलिसांनी दिली.

कात्रज, कोंढवा तसेच शहरातील विविध भागांतून रिक्षामधून प्रवास करताना आसिफ रिक्षाचालकांना हेरून त्यांच्याकडे महागडे मोबाइल आहेत का हे पाहायचा. त्यानंतर रिक्षातून उतरल्यावर मोबाइल घरीच राहिला असल्याची बतावणी करत एक फोन करण्यासाठी संबधित रिक्षा चालकाकडून मोबाइल घ्यायचा. चालक आपली रिक्षा उभी करण्यात गुंग असताना तो मोबाइल घेऊन पसार व्हायचा. मोबाइल चोरणाऱ्या आसितची माहिती पोलिसांना एका खबऱ्याकडून मिळाली होती. पोलिसांनी त्याला ताब्यात घेत चौकशी केल्यानंतर या संपूर्ण प्रकरणाचा उलगडा झाला. त्याने चोरीचे कारण सांगितल्यानंतर पोलिसांनाही आश्चर्य वाटले. करताना आसिफने इतर कुणाचेही फोन न चोरता केवळ रिक्षाचालकांचे फोन चोरल्याचे पोलिसांना सांगितले. पोलिसांनी त्याला कोर्टात हजर केले असता त्याला २७ ऑगस्टपर्यंत पोलीस कोठडी सुनावली.