दक्षिण कोरियात रेड अलर्ट; चर्चच्या चुकीमुळे पुन्हा करोनाचा धोका!

सेऊल: करोनाबाधितांच्या वाढच्या संख्येमुळे दक्षिण कोरियातील प्रशासन पुन्हा सतर्क झाले असून रेड अलर्ट जारी केला आहे. करोनाचा संसर्ग पुन्हा एकदा देशभरात फैलावण्याची भीती अधिकाऱ्यांनी व्यक्त केली आहे. कोरियातील एका चर्चमुळे पुन्हा एकदा देशभरात करोनाचा संसर्ग पसरण्याची टांगती तलवार आहे. या चर्चशी निगडीतच असलेल्या करोनाबाधितांची संख्या ३१९वर पोहचली आहे.

दक्षिण कोरियात सलग ११ व्या दिवशी तीन आकडी रुग्णसंख्या असून, सोमवारीही देशात २६६ नवे रुग्ण आढळले होते. आढळलेले नवे रुग्ण हे बुसान, दायेजिओंग आणि सेजोंग या भागात आढळले आहेत. येत्या काही दिवसांत रुग्णसंख्येचा आकडा मोठ्या प्रमाणात वाढण्याची भीती कोरियाच्या साथरोग प्रतिबंधात्मक केंद्राचे संचालक जिओंग यून केयाँग यांनी म्हटले आहे. वाढती रुग्णसंख्या पाहून सरकारने रविवारीच मोठे उपस्थितीतील कार्यक्रम, नाइट क्लब आणि चर्चेसमधील गर्दीवर बंदी घातली आहे. खेळांसाठी उपस्थित असलेल्या चाहत्यांनाही दूर करण्यात आले आहे.

वाचा:

काही दिवसांआधी करोनाशी लढण्याच्या मॉडेलसाठी दक्षिण कोरियाचे एक कौतुक केले जात होते. नवीन करोनाबाधितांची बहुतांशी प्रकरणे राजधानी सेऊलच्या आसपासची आहेत. सेऊलची लोकसंख्या जवळपास एक कोटी आहे. चर्चमध्ये जाणाऱ्या लोकांना करोनाची बाधा झाल्यामुळे चिंता व्यक्त केली जात आहे. चर्च बंद करण्यासाठी करोनाचा विषाणू फैलावण्याचा कट असल्याचे मत या चर्चच्या संबंधित लोकांचे आहे. या चर्चशी संबंधित अनेकजण भूमिगत झाले असून काहीजण कोरियाच्या इतर प्रातांत लपून बसले असल्याचे प्रशासनाने म्हटले आहे. चर्चमध्ये जाऊन करोनाबाधित झालेले बहुतांशीजण युवक असून त्यांचे वय २० ते ३० च्या दरम्यान आहे.

वाचा:

या चर्चचे प्रमुख जुन-क्वांग-हू यांनाही करोनाची बाधा झाली आहे. या चर्चने सरकारविरोधात मोर्चाही काढला होता. आता या मोर्चात सहभागी झालेल्या लोकांनी क्वारंटाइन होण्याचे आदेश सरकारने दिले आहेत. चर्च पादरींवर आयसोलेशनचे नियम मोडण्याचाही ठपका ठेवण्यात आला आहे. राष्ट्रपती मू जे-इन यांनी या मोर्चात सहभाग घेणाऱ्यांवर टीका केली आहे. या मोर्चातील लोकांनी इतर नागरिकांचे प्राण धोक्यात घालण्याचा गुन्हा केला असल्याचे त्यांनी म्हटले. या मोर्चात सहभागी झालेल्यापैकी जवळपास ३४०० जणांची ओळख पटवून त्यांना क्वारंटाइन करण्यात आले असल्याची माहिती आरोग्य उपमंत्र्यांनी दिली.

वाचा:

दक्षिण कोरियात याआधी शिन्जेऑन्जी चर्चमुळे करोनाचा संसर्ग फैलावला होता. या चर्चचे संस्थापक ली-मन-ही यांच्यासह ११ जणांविरोधात गुन्हा दाखल करण्यात आला आहे. तर, करोनाचा विषाणू हा सैतानाने फैलावला असल्याचा दावा चर्च प्रमुख ली यांनी केला होता. या वक्तव्यानंतर त्यांच्यावर टीका झाल्यानंतर त्यांनी दिलगिरी व्यक्त केली.