ढगाळ वातावरण आणि पावसामुळे तापमानात थोडी घट नोंदविण्यात आली. संध्याकाळी कार्यालये सुटण्याच्या वेळी पाऊस पडल्याने नागरिकांची धावपळ झाली. घाटमाथ्यावरही गेल्या काही दिवसांच्या तुलनेत पावसाचा जोर वाढला होता. आठवडाभर शहरात पाऊस हजेरी लावणार असल्याचे ‘आयएमडी’ने संकेत दिल्याने नागरिकांना दिलासा मिळाला आहे.
दुसरीकडे, पिंपरी हवामान खात्याने इतर जिल्ह्यांसह पुणे जिल्ह्यात २१ जुलैपर्यंत मध्यम व मुसळधार पावसाचा इशारा दिला आहे. या पार्श्वभूमीवर पिंपरी-चिंचवडकरांनी दक्ष राहावे, असे आवाहन महापालिकेचे आयुक्त तथा प्रशासक शेखर सिंह यांनी केले आहे. हवामान खात्याच्या अंदाजानुसार पुढील तीन ते चार दिवस राज्यात ठिकठिकाणी मध्यम ते मुसळधार पाऊस पडण्याची शक्यता आहे. पावसामुळे विविध प्रवाहांतून थेट नदीपात्रात येणाऱ्या पाण्यामुळे पातळीत वाढ होऊन आपत्कालीन परिस्थिती उद्भवू शकते. या पार्श्वभूमीवर जीवित अथवा वित्तहानी होऊ नये, यासाठी महापालिकेच्या सर्व यंत्रणांनी सज्ज रहावे, असे आदेश प्रशासनाला देण्यात आले आहेत.
Weather Forecast : आनंदाची बातमी: राज्यात पुन्हा मान्सून सक्रिय; पुढील आठवडाभर या भागाला पाऊस झोडपून काढणार!शहरातील ज्या भागात पूरसदृश परिस्थिती उद्भवते, अशा ठिकाणी जाऊन प्रत्यक्ष पाहणी करून आढावा घेण्याच्या सूचना संबंधित अधिकाऱ्यांना दिल्या आहेत. नदीकाठी असणाऱ्या शहरातील वस्त्यांमध्ये महानगरपालिकेचे पथक लक्ष ठेवून आहे. आपत्कालीन परिस्थिती हाताळण्यासाठी त्या त्या क्षेत्रातील क्षेत्रीय अधिकाऱ्यांच्या नियंत्रणाखाली स्वतंत्र पथक स्थापन करण्यात आले आहे. याशिवाय नागरिकांच्या सोयीसाठी सर्व अग्निशमन केंद्राच्या ठिकाणी पूर नियंत्रण कक्ष सुरू आहेत. महापालिकेच्या मुख्य प्रशासकीय इमारतीत मध्यवर्ती पूर नियंत्रण कक्ष आठवड्यातील २४ तास कार्यान्वित असून, आपत्कालीन परिस्थितीत कक्षाशी संपर्क साधावा, असे आवाहन आपत्ती व्यवस्थापन विभागाचे सह आयुक्त चंद्रकांत इंदलकर यांनी केले आहे. ‘अग्निशमन यंत्रणा सज्ज’ संभाव्य परिस्थिती लक्षात घेऊन अग्निशामक विभागाचे कर्मचारी शहरात फिरतीवर असतील. पावसामुळे झाडपडीचे; तसेच इतर आपत्कालीन प्रसंग उद्भवल्यास अग्निशमन यंत्रणा सज्ज असून, बचाव कार्यासाठी पथक कार्यरत राहील, अशी माहिती अग्निशमन विभागाचे सहायक आयुक्त विजयकुमार थोरात यांनी दिली. पावसाचा जोर वाढला पवना धरण क्षेत्रात पावसाचा जोर वाढला असून, गेल्या २४ तासांत ९८ मिलिमीटर पावसाची नोंद झाली आहे. त्यामुळे धरणाच्या पाणीसाठ्यात एका दिवसांत १.८६ टक्के (३.५ टीएमसी) वाढ झाली आहे. एक जूनपासून या क्षेत्रात ८३४ मिलिमीटर पाऊस झाला असून, तो गेल्या वर्षीच्या आजच्या तारखेपर्यंतच्या तुलनेत १६१ मिलिमीटरने जास्त आहे, असे पाटबंधारे विभागाने स्पष्ट केले.
दरम्यान, पुणे शहर आणि परिसरात मंगळवारी दिवसभर पावसाची रिपरिप सुरू होती. मंगळवारी रात्री साडेआठपर्यंत शिवाजीनगर येथे दोन मिलिमीटर पावसाची नोंद झाली. लोहगाव येथे चार मिमी आणि चिंचवड येथे ५.५ मिमी पावसाची नोंद झाली आहे. बुधवारी शहरात हलक्या ते मध्यम स्वरूपाचा पाऊस होण्याची शक्यता आहे. घाट परिसरात पावसाचा जोर अधिक असेल, अशी शक्यता हवामान विभागाने वर्तविली आहे. शहरात मंगळवारी दिवसभर हलक्या स्वरूपाचा पाऊस झाला. मधूनच एखाद्या मोठ्या सरीने हजेरी लावली. शहरातील काही रस्त्यांवर खड्डे पडल्याने वाहतुकीचा वेग मंदावल्याचे दिसून आले.
