मुंबई विमानतळासाठी अदानी-जीव्हीकेमध्ये 'काँटे की टक्कर'

तोट्यात असलेले व त्याचवेळी आर्थिक गैरव्यवहारांच्या चौकशीचा सामना करणारे अदानी समूहाकडे जाण्याची शक्यता निर्माण झाली आहे. विमानतळावरील ५०.५० टक्के व पुढे उर्वरित हिस्सा खरेदी करण्याच्या हालचाली अदानी समूह व जीव्हीके यांच्यात सुरू झाल्या आहेत.

मुंबईचे छत्रपती शिवाजी आंतरराष्ट्रीय विमानतळ ‘मुंबई आंतरराष्ट्रीय विमानतळ लिमिटेड’मार्फत (मिआल) चालवले जाते. मिआल ही जीव्हीके होल्डिंगची उपकंपनी आहे. या कंपनीत ५०.५० टक्के हिस्सा जीव्हीके समूहाचा आहे. तर १३.५० टक्के भागीदारी दक्षिण आफ्रिकन कंपनीची आहे. तर १० टक्के भागीदारी अबु धाबीच्या पेन्शन प्राधिकरणाने केली आहे. उर्वरित २६ टक्के भागीदारी केंद्र सरकारच्या भारतीय विमानतळ प्राधिकरणाची आहे. यापैकी जीव्हीकेचा ५०.५० टक्के पहिल्या टप्प्यात व दक्षिण आफ्रिकन कंपनी आणि अबुधाबीचा १० टक्के हिस्सा पुढील टप्प्यात खरेदी करण्याची तयारी अदानी समूहाने सुरू केली आहे. असा प्रयत्न त्यांनी मागीलवर्षीही केला होता, हे विशेष.

याआधी मिआलमध्ये जीव्हीके व दक्षिण आफ्रिकन विमानतळ कंपनीसह बिडवेस्ट या कंपनीची भागीदारी होती. पण बिडवेस्ट मागीलवर्षी ऑक्टोबरमध्ये १० टक्क्यांसह बाहेर पडली. त्यावेळी बिडवेस्टचा हा हिस्सा १२४८ कोटी रुपयांना खरेदी करण्यासह एकूण १० हजार कोटी रुपयांच्या गुंतवणुकीची तयारी अदानी समूहाने केली होती. परंतु त्यावेळी जीव्हीकेने अबुधाबीहून ७६४८ कोटी गुंतवणूक आणत ‘अदानी’ला रोखले होते. आता मात्र मिआल कंपनीच संकटात आहे. त्यामुळे अदानी समूहाने याबाबत आक्रमकरित्या चर्चा सुरू केली आहे. संबंधित सूत्रांनी सांगितले की, ‘अदानी समूहाचा हा व्यवहार येत्या काही आठवड्यांत पूर्ण होऊ शकतो. या व्यवहारांना अबुधाबी पेन्शन निधी आणि राष्ट्रीय गुंतवणूक व पायाभूत सुविधा निधीनेही मंजुरी दिली आहे. हा व्यवहार पूर्ण झाल्यास मुंबईचे विमानतळाची ७६ टक्के हिस्सेदारी अदानी समूहाकडे जाईल.’