म. टा. विशेष प्रतिनिधी, मुंबई

करोनाच्या संकटामुळे मे, जून व जुलैमध्ये लॉकडाउनची कडक अंमलबजावणी करण्यात आली असताना आणि कुठेही कार्यक्रम करून जमाव जमण्यास बंदी घातलेली असताना, उल्हासनगरमध्ये साई वसन शाह दरबार या मंदिरात मात्र वाढदिवस, लग्न समारंभ, गुरुपौर्णिमा असे विविध कार्यक्रम आयोजित करून गर्दी जमवण्यात आल्याचे धक्कादायक प्रकार घडले. मुंबई उच्च न्यायालयाने याची गंभीर दखल घेऊन यासंदर्भात संबंधितांवर केलेल्या कारवाईची माहिती प्रतिज्ञापत्रावर दाखल करण्याचे निर्देश दिले आहेत.

पर्यावरणप्रेमी सरिता खानचंदानी व हिराली फाऊंडेशनने अॅड. प्रवर्तक पाठक यांच्यामार्फत याचिका करून हे गंभीर प्रकार निदर्शनास आणले आहेत. याविषयी मंगळवारी न्या. आर. डी. धनुका व न्या. व्ही. जी. बिश्ट यांच्या खंडपीठासमोर ‘व्हिडीओ कॉन्फरन्सिंग’द्वारे सुनावणी झाली. त्यावेळी कारवाईविषयीचा तपशील प्रतिज्ञापत्रावर मांडण्यासाठी मुदत देण्याची विनंती सरकारी वकिलांनी केल्याने खंडपीठाने मुदत देऊन त्याविषयी निर्देश दिले.

‘लॉकडाउन असूनही नियमांचा उघडपणे भंग करून उल्हासनगरमधील साई वसन शाह दरबार या मंदिरात १७ व १८ मे रोजी कमलेश परमानंद जग्यासी उर्फ काली साई यांच्या वाढदिवसाच्या कार्यक्रमाचे आयोजन करण्यात आले. विशेष म्हणजे, त्या कार्यक्रमाला जवळपास ५० लोक केवळ जमलेच नाही, तर सुरक्षित वावरच्या नियमांचीही पायमल्ली करण्यात आली. त्यानंतर २४ मे रोजी त्याच ठिकाणी जग्यासी यांचे एक भक्त कुणाल भक्तापुरी यांच्या लग्नाचा कार्यक्रम होऊन त्यालाही गर्दी जमली. हे प्रकार उघडपणे होत असूनही महापालिका प्रशासन व हिल लाइन पोलिस ठाण्याकडून त्याकडे दुर्लक्ष करण्यात आले. काही सजग नागरिकांकडून याविषयीची माहिती मिळाल्यानंतर आम्ही ट्विटद्वारे त्याकडे लक्ष वेधले. त्यानंतर पोलिसांनी १ जून रोजी एफआयआर नोंदवला आणि त्या मंदिरातील सीसीटीव्ही फुटेज जप्त केले. जवळपास ५० लोक कार्यक्रमाला जमल्याचे दिसते आणि त्यापैकी १३ जण करोना पॉझिटिव्ह असून त्यातील पाच जण हे जग्यासी यांच्या कुटुंबातील आहेत, असेही पोलिसांनी फुटेजचा आधार घेत नोंदवलेल्या एफआयआरमध्ये नमूद आहे. कमलेश जग्यासी यांच्या वाढदिवसाच्या कार्यक्रमानंतर त्यांची बहीण गीताचा २४ जून रोजी तर एका भक्ताचा १२ जूनला मृत्यू झाल्याचे नंतर उघड झाले’, असे याचिकादारांनी याचिकेत निदर्शनास आणले आहे.

तसेच ‘गर्दी जमून असे कार्यक्रम झाल्यानंतर शहरातील करोना संसर्ग वाढल्याचे दिसून येते. त्यामुळे या साऱ्याकडे जाणीवपूर्वक दुर्लक्ष करून कर्तव्यात हलगर्जीपणा करणाऱ्या महापालिकेतील संबंधित अधिकारी व संबंधित पोलिसांविरोधात कारवाई व्हायला हवी. तसेच या साऱ्या प्रकरणाचा तपास सीआयडीकडे देणे आवश्यक आहे. त्यामुळे तसे निर्देश द्यावेत’, अशी विनंतीही याचिकादारांनी याचिकेत केली आहे.

Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times

LEAVE A REPLY

Please enter your comment!
Please enter your name here