'स्वदेशी शस्त्रांनी युद्ध जिंकण्याइतका मोठा आनंद कुठलाच नसेल'

नवी दिल्लीः चीफ ऑफ डिफेन्स स्टाफ ( CDS) जनरल यांनी मोठं विधान केलं आहे. करोना संकटाविरोधात भारत ज्या प्रकारे लढत आहे यावरून कुठल्या अनुचित घटनेचा किंवा संकटाचा सामना करण्यासाठी देश पूर्णपणे सक्षम आहे हे स्ष्ट होतं. भारत विद्यमान स्थितीत एक-दोन नव्हे तर एकावेळी अनेक समस्यांचा सामना करत आहे, असं जनरल बिपीन रावत म्हणाले. एका वेबिनारमध्ये रावत बोलत होते.

उच्च क्षमतेच्या स्वदेशी शस्त्रांचे उत्पादन करण्याची ताकद आणि क्षमता आपल्या देशात आहे. सरकारने दाखवलेले योग्य मार्ग आणि मोहीमेला चालना देण्यासह आता वेळ आहे आत्मनिर्भर बनण्याची आणि उत्पादनांच्या निर्यातीची. भारतीय सैन्यातील तिन्ही दल ‘आत्मनिर्भर भारत’ साठी कटिबद्ध आहेत. भारतात विकसित तंत्रज्ञान आणि उत्पादनांच्या जोरावर युद्ध जिंकणं या शिवाय आम्हाला सर्वाधिक समाधान कुठलंच नसेल, असं जनरल बिपीन रावत म्हणाले.

लवकरच ‘मेक फॉर वर्ल्ड’चा दर्जा मिळवेल भारतः राजनाथ सिंह

जगभरात योगदान देण्यासाठी देशाला आत्मनिर्भर करणं हा आमचा उद्देश आहे. या दृष्टाने आम्ही १०१ संरक्षण सामग्री आणि साहित्यांच्या आयातीवर बंदी घालत धाडसी आणि धोरणात्मक निर्णय घेतले आहेत. आपण सहकार्यातून आणि सहयोगाच्या माध्यमातून फक्त ‘मेक इन इंडिया’च नव्हे तर ‘मेक फॉर वर्ल्ड’चा दर्जाही मिळवू, असं संरक्षणमंत्री राजनाथ सिंह म्हणाले.