बुलढाणा : समृद्धी महामार्गावरील अपघाताचे तांडव अनेक उपाययोजना अनेक कडक नियम करून देखील काही केल्या थांबत नसून किंबहुना धोका कमी होण्याचं नाव घेत नाही आहे. १ जुलै रोजी विदर्भ ट्रॅव्हल्सची खासगी बसला झालेल्या भीषण दुर्दैवी अपघातात २५ जणांचा मृत्यू झाला होता. पुढील काही दिवस अपघाताचे सत्र थांबले होते. पण, आज पुन्हा एकदा एका केमिकल टँकरचा भीषण अपघात झाला. सुदैवाने यात जीवितहानी झाली नाही समृद्धी महामार्गावर केमिकल घेऊन जाणाऱ्या ट्रकला भीषण आग लागल्याची धक्कादायक घटना समोर आली आहे. आग लागताच चालकाने खाली उडी मारल्याने त्याचा जीव वाचला आहे. परंतु, ट्रक जळून खाक झाला आहे. परिणामी समृद्धी महामार्गावरील वाहतूक खोळंबल्याचं पाहायला मिळत आहे. बुलढाणा जिल्ह्यातील मेहकर नजीक ही घटना घडली आहे. ट्रकला आग लागण्याच्या घटनेत कोणतीही जीवीतहानी झाल्याचं वृत्त अद्याप समोर आलेलं आहे. त्यामुळं आता समृद्धी महामार्गावरील अपघातांचा मुद्दा पुन्हा एकदा ऐरणीवर येण्याची शक्यता आहे.मिळालेल्या माहितीनुसार, नाशिकहून नागपूरच्या दिशेने केमिकलची वाहतूक करत असलेल्या भरधाव ट्रकला मध्यरात्री अचानक आग लागली. बुलढाण्याजवळील मेहकर जवळ ही घटना घडली असून आग लागल्याची घटना समजताच चालकाने खाली उडी मारली. त्यामुळं ड्रायव्हरचा जीव वाचला असून ट्रक आगीत जळून भस्मसात झाला आहे. या घटनेत कोणतीही जीवीतहानी झालेली नसली तरी ट्रकमधील संपूर्ण केमिकल जळून खाक झालं आहे. समृद्धी महामार्गावरील नागपूरकडे जाणाऱ्या मार्गिकेवर ट्रक जळून खाक झाल्याने कॉरिडॉरवरील वाहतूक काही काळ थांबवावी लागली होती. अपघाताची माहिती मिळताच स्थानिक नागरिकांनी तातडीने घटनास्थळी धाव घेत बचावकार्य सुरू केलं. ट्रक अपघाताच्या घटनेनंतर समृद्धी महामार्गावर काही वेळ वाहतूक खोळंबली होती. त्यानंतर आता वाहतूक सुरळीत करण्यात आली आहे.समृद्धी महामार्गावरील अपघात टाळण्यासाठी वाहतूक विभागाकडून अनेक उपाययोजना करण्यात येत आहेत. वाहनांची तपासणी, टायर तपासणी करुनच वाहनांना समृद्धी महामार्गावर प्रवेश दिला जातो. तरी देखील टायर फुटण्याच्या घटना घडत आहेत.
