म. टा. प्रतिनिधी, पिंपरी : भाडेकरूंची माहिती वेळेत पोलिसांना न कळविणे शहरातील घरमालकांना चांगलेच महागात पडले आहे. भाडेकरूंची माहिती न दिल्याने पोलिसांनी शहरातील १६६ घरमालकांवर गुन्हे दाखल केले आहेत. पोलिसांनी वारंवार केलेल्या आवाहनाला प्रतिसाद न दिल्याने पोलिसांनी कारवाईचा बडगा उगारला आहे.वाकड पोलिस ठाण्याच्या हद्दीतील डांगे चौक येथे चोरट्यांनी भिंतीला भगदाड पाडून बँकेत चोरी करण्याचा प्रयत्न केला. विशेष बाब म्हणजे चोरटे बाजूच्या खोलीत भाड्याने राहत असल्याचे पोलिस तपासात समोर आले आहे. घरमालकाने या भाडेकरूची कोणतीही नोंद घेतली नव्हती. या घटनेमुळे शहरातील नोंद नसलेल्या भाडेकरूंचा मुद्दा पुन्हा एकदा ऐरणीवर आला आहे. दरम्यान, पोलिसांनी भाडेकरूंची माहिती द्यावी, असे आवाहन शहरातील घरमालकांना केले आहे. त्यासाठी सोशल मीडियावरून जनजागृतीही करण्यात आली. तरीही घरमालक याकडे दुर्लक्ष करीत असल्याने पोलिसांनी शेवटी कारवाईचे हत्यार उपसले आहे. पोलिसांनी शहरातील वेगवेगळ्या भागांतील घरमालकांवर गुन्हा दाखल केला आहे. आतातरी घरमालकांचे पाय पोलीस स्टेशनकडे वळतील, अशी पोलिसांना अपेक्षा आहे.परदेशी नागरिकांचेही अवैध वास्तव्यपोलिस आयुक्तांच्या आदेशानुसार स्थानिक पोलिसांची पथके भाडेकरूंच्या नोंदी तपासण्यासाठी हद्दीत फिरत आहेत. या वेळी सांगवीसह अन्य काही पोलिस ठाण्याच्या हद्दीत परदेशी नागरिक कोणतीही नोंद; तसेच व्हिसाची मुदत संपूनही अवैधरीत्या देशात राहत असल्याचे समोर आले आहे. त्यामुळे पोलिसांनी राबवलेली ही मोहीम सुरक्षेच्या दृष्टीने महत्त्वाची ठरत आहे. पुण्यात दहशवादी पकडल्याने ‘अॅलर्ट’पुणे पोलिसांना गस्तीदरम्यान दोन मोस्ट वाँटेड दहशतवादी आढळले. यातील विशेष बाब म्हणजे हे दहशतवादी बिनधास्तपणे शहरात फिरत होते. पुणे पोलिसांच्या या कारवाईमुळे राज्यातील गोपनीय यंत्रणांना अॅलर्ट देण्यात आला आहे. या पार्श्वभूमीवर शहरात पोलिसांनी भाडेकरूंच्या नोंदीची मोहीम हाती घेतली आहे.ऑनलाइन नोंदींकडे पाठभाडेकरू नोंद करण्यासाठी पोलिसांच्या या संकेतस्थळावर लिंक देण्यात आली आहे. त्यावर क्लिक करून नोंदीची प्रक्रिया करता येते; तसेच इंटरनेटचा वापर शक्य नसलेल्यांनी नजीकच्या पोलिस ठाण्यात जाऊन फॉर्म भरून द्यावा. त्यासाठी भाडेकरू, घरमालकाचे फोटो, सरकारी ओळखपत्र आदींची आवश्यकता भासते. सर्व सुविधा उपलब्ध करूनही घरमालक भाडेकरू नोंदीकडे पाठ फिरवत असल्याचे दिसून आले आहे. प्रत्येक भाडेकरूची माहिती नजीकच्या पोलिस ठाण्यात देणे घरमालकांसाठी बंधनकारक आहे. त्यामुळे गुन्हा घडल्यानंतर संबंधित भाडेकरूची ओळख पटवणे; तसेच, त्याचा माग काढणे शक्य होईल. भाडेकरूंची माहिती देण्यास टाळाटाळ करणाऱ्यांवर कायदेशीर कारवाई करण्याचे काम हाती घेण्यात आले आहे. – विनयकुमार चौबे, पोलिस आयुक्त, पिंपरी-चिंचवडपोलिस ठाणे अन् दाखल गुन्हे
- चिखली पोलिस ठाणे- ४५
- सांगवी पोलिस ठाणे- ३५
- चाकण पोलिस ठाणे- २४
- हिंजवडी पोलिस ठाणे- २२
- रावेत पोलिस ठाणे- २०
- वाकड- १२
- एमआयडीसी भोसरी- ०५
- दिघी- ०३
