महाराष्ट्राचे नंदनवन असलेल्या पाचगणी, महाबळेश्वर या ठिकाणी पावसाळी पर्यटनासाठी पर्यटकांची गर्दी वाढू लागली आहे. पर्यटक हे महाबळेश्वर येथील प्रेक्षणीय ठिकाणांना भेट देत असतात. काल, सोमवारी महाबळेश्वर येथील केट्स पॉइन्ट येथे पर्यटकांची भरपूर गर्दी होती. त्यातच या भागात माकडेही मोठ्या प्रमाणात आहेत.
पर्यटकही या माकडांना हौसेने चणे, भाजलेले कणीस आदी पदार्थ खाण्यास देत असल्याने त्यांचा वावर या ठिकाणी मोठ्या प्रमाणात वाढला आहे. दरम्यान, पर्यटनासाठी उत्तर प्रदेशमधून आलेल्या शुभम अगरवाल यांच्या पत्नीची पर्स अचानक माकडांनी हातातून हिसकावून घेतली आणि पळतपळत जाऊन ती शेजारील २०० फूट खोल दरीमध्ये टाकून दिली. त्यामुळे हे पर्यटक पती-पत्नी हवालदिल झाले. कारण त्यात रोख रक्कम ३५ हजार रुपये, एक घड्याळ व इतर साहित्य होते.
लाल भडक टोमॅटोला भाव कडक! अवघ्या एक एकरवर लागवड, शेतकरी दाम्पत्याला १५ लाखांचं उत्पन्न
शुभम अग्रवाल माकडाने पर्स पळवल्याने हतबल झाले होते. त्यांनी मदतीसाठी धावाधाव केली. ही गोष्ट महाबळेश्वर ट्रेकर्स टीमचे जयवंत बिरामणे व अनिल लांगी यांना समजताच हे दोघे जण केट्स पॉईंटवर दाखल झाले. त्यानंतर त्यांनी दोराच्या साह्याने २०० फूट दरीत उतरून माकडांनी फेकून दिलेल्या पर्सची शोधाशोध केली.
पर्स दरीतील झाडीत पडलेली व पावसामुळे गवत वाढल्याने शोधण्यासाठी अडथळा येत होता, पण अथक प्रयत्नातून ती पर्स सापडली. २०० फूट खोल दरीतून पर्स बाहेर काढून अगरवालांना देण्यात आली. यामुळे दाम्पत्याच्या चेहऱ्यावर आनंद ओसंडून वाहत होता. माकडाने दरीत मुद्देमालासह फेकून दिलेली पर्स काढून दिल्याबद्दल जयवंत बिरामणे आणि अनिल लांगी यांचे सर्वत्र कौतुक होत आहे.
अहो आश्चर्यम्! विहिरीत वळवळणारा नाग बाहेर काढला, तोंडातून दुसरा नाग बाहेर पडला, VIDEO समोर
मे महिन्यात महाबळेश्वर पालिकेच्या वतीने पर्यटकांना त्रास देणाऱ्या माकडांना पकडण्याची मोहीमही राबवण्यात आली होती. मात्र, त्याला यश आल्याचे दिसत नाही. या माकडांना पर्यटक खाद्यपदार्थ देत असल्यामुळे तीही माणसाळलेली आहेत. मात्र, अधूनमधून त्यांचेही कृत्य पर्यटकांना त्रासदायक ठरत आहे.
