नागपुरात करोनाचा प्रादुर्भाव थांबेना, दिवसभरात ३३ जणांचा मृत्यू

म. टा. प्रतिनिधी, नागपूरः जुलैच्या मध्यापर्यंत ५ ते १० पेशंटवर आटोक्यात असलेला करोना विषाणूचा प्रादुर्भाव आता उद्रेकाच्या ज्वालामुखीवर जाऊन बसला आहे. गेल्या आठ दिवसांपासून सुरू असलेली सहस्त्रकाची साखळी आणखी किती दिवस कायम राहिल या नव्याच धास्तीने आता नागपूरकरांनी बसली आहे. शनिवारी दिवसभरात यात आणखी नव्या ९२१ जणांची भर पडली तर उपचारादरम्यान ३३ बाधितांनी अखेरचा श्वास मोजला. त्यामुळे आतापर्यंत करोनाच्या प्रादुर्भावाचा आकडा आता २७ हजारापुढे १७ वर थांबला. तर आजवर करोनाची बाधा होऊन मरण पावलेल्यांची संख्या आता ९७९ वर गेली.

या घडामोडीत शनिवारी जिल्ह्यात उपचार घेत असलेले १११२ बाधित करोनावर मात करून घरी परतले. त्यामुळे आजारमुक्तीची संख्याही १७ हजाराच्या उंबरठ्यावर गेली आहे. दिवसभरात जिल्ह्यात ५२३४ संशयितांच्या घशातील स्राव नमुना तपासला गेला. यात ४११३ जणांचा अहवाल निगेटिव्ह आला तर उर्वरित ९२१ जणांना करोनाने गाठल्याचे निदान करण्यात आले. करोनाचा अहवाल पॉझिटिव्ह आलेल्या शहरातील रहिवाशांमध्ये लक्ष्मीनगर झोनमधील ४०, धरमपेठ झोनमधील ६४, हनुमान नगरमधील ५७, धंतोली ३०, नेहरू नगर ६१, गांधीबाग ७७, सतरंजीपूरा ४०, लकडगंज ३२, आसीनगर २६ आणि मंगळवारी झोनमधील ८५ रहिवाशांचा समावेश आहे.

नव्याने करोनाची बाधा झाल्याचे स्पष्ट झालेल्यापैकी ४९३ नमुने अँटिजन रॅपिड टेस्टमधून पॉझिटिव्ह आढळले. त्या खालोखाल खासगीतून ३३०, मेडिकलमधून ३७, निरीतून १७ तर एम्समधून १५ जणांच्या घशातील स्त्राव नमुन्यात विषाणूचा अंश आढळला. सध्याच्या स्थितीत शहरात ६८४२ तर जिल्ह्यात २२२७ सक्रिय करोना बाधित उपचार घेत आहेत. यातील ३०६९ जणांना सौम्य, मध्यम आणि तिवृ स्वरुपाची लक्षणे असल्याने रुग्णालयात उपचार सुरू आहेत. सध्याच्या स्थितीत शहरात करोनावर उपचार करणारे ३७ कोव्हिड केअर सेंटर्स कार्यरत आहेत. या खेरीज ६००० जणांना विषाणू बाधा झालेली असली तरी लक्षणे नसल्याने घरीच विलगीकरणात ठेवण्यात आले आहे. आज दिवसभरात उपचारादरम्यान अखेरचा श्वास घेतलेल्या करोना बाधितांपैकी २७ शहरातील, ४ ग्रामीण भागातील तर २ जिल्ह्याबाहेरील रहिवासी होते.

आजचे पॉझिटिव्ह- ९२१
जिल्ह्यातील पॉझिटिव्ह- २७६
आतापर्यंत पॉझिटिव्ह- २७०१७
आजचे करोनामुक्त- १११२
आतापर्यंत करोनामुक्त- १६९६७
आजचे निगेटिव्ह- ४११३
सक्रिय करोनाबाधित- ९०६९