मासे पकडण्यासाठी गेले, सेल्फीच्या नादात आईसमोर सख्खे भाऊ नदीत बुडाले

कल्याणः भिवंडी येथील कामावरी नदीत मासेमारी करण्यासाठी गेलेल्या दोन सख्ख्या भावांचा बुडून मृत्यू झाल्याची दुर्दैवी घटना भिवंडीत घडली आहे. बुडालेल्या दोन्ही भावांचे मृतदेह अग्निशमक दलाने बाहेर काढले. मासेमारी करताना हे दोघं भाऊ सेल्फी काढायला गेले आणि त्यात त्यांचा मृत्यू झाला. शहबाज अन्सारी आणि शाह आलम अन्सारी अशी या दोघा मृतांची नावं आहेत.

नदीत पडून दोन भावांचा मृत्यू

शहबाज आणि शाह आलम हे दोघे भाऊ शनिवारी संध्याकाळी ४ वाजता भिवंडी येथील कामवारी नदीत चाविंद्रा पेट्रोल पंपाच्यामागे मासे पकडण्यासाठी गेले होते. यावेळी त्यांची आई देखील त्यांच्यासोबत होती. मासेमारी करताना सेल्फी घेण्याच्या नादात एकाचा पाय घसरला आणि तो पाण्यात बुडाला. भावाला बुडताना बघून दुसऱ्या भावाने पाण्यात उडी घेतली. मात्र पाण्याचा अंदाज न आल्यामुळे दोन्ही भाऊ पाण्यात बुडाले. आईच्या डोळ्यादेखत हा सर्व प्रकार घडला. आपल्या मुलांना पाण्यात वाहून जाताना तिनं पाहिलं.

आईने केलेल्या आरडाओरडीमुळे स्थानिकांनी घटनास्थळी धाव घेतली. स्थानिक तरूणांनी तातडीने पाण्यात उतरून शोधकार्य सुरू केलं. रात्री साडेसातनंतर त्यांचे मृतदेह बाहेर काढण्यात यश आलं. या दुर्दैवी घटनेमुळे मिल्लत नगर भागात शोककळा पसरली.