नगरमधील मोहरम हा देशात प्रसिद्ध आहे. दरवर्षी येथे मोहरमची मोठी विसर्जन मिरवणूक काढण्यात येत असते. यंदाच्या वर्षी मात्र करोनाचा प्रादुर्भाव सुरू असल्यामुळे मोहरम सवारी विसर्जन मिरवणुकीस निर्बंध घालण्यात आले होते. या पार्श्वभूमीवर मुस्लिम बांधवांनीही सर्व नियमांचे पालन करीत सवाऱ्यांचे विसर्जन करण्याचा निर्णय घेतला आणि प्रशासनाला सहकार्य केले. कोठला व हवेली या दोन्ही ठिकाणी अतिशय शांतता आणि धार्मिक वातावरणात सवाऱ्यांचे विसर्जन करण्यात आले. सवारी विसर्जनासाठी मोजक्याच भाविकांची नियुक्ती करण्यात आली होती. प्रशासनातर्फे त्यांना पास देण्यात आले होते. कोठला परिसरात कोणालाही प्रवेश देण्यात आला नव्हता.
दरम्यान, मोहरमच्या पार्श्वभूमीवर कोठला परिसरात पोलिसांनी चोख बंदोबस्त तैनात केला होता. कोठला आणि हवेलीकडे येणारे सर्व रस्ते बंद केले होते. पोलीस अधिक्षक अखिलेश कुमार सिंह, अपर पोलीस अधीक्षक सागर पाटील, उपविभागीय पोलीस अधिकारी संदीप मिटके यांच्याकडून सातत्याने परिस्थितीचा आढावा घेण्यात येत होता.
Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times
