'बीसीसीआयला जर आयपीएल रद्द करायची असेल तर त्यांनी लवकर सांगावे'

बीसीसीआयला जर यावर्षीचे आयपीएल रद्द करायची असेल तर त्यांनी आम्हाला लवकर सांगावे. कारण आतापर्यंत आम्ही संघावर काही खर्च केला आहे. पण जर अजून काही दिवसांनी बीसीसीआयने आयपीएल रद्द करण्याचा निर्णय घेतला तर त्यामध्ये संघ मालकांचे मोठे नुकसान होईल, असे मत आयपीएलमधील एका संघाच्या फ्रँचायझीने व्यक्त केले आहे.

युएईमध्ये करोनाबाबत कडक नियम आहेत. दुबई आणि शारजा येथे कडक नियम नसले तरी अबुधाबीमध्ये मात्र कठोर नियम आहेत. आबुधाबीमध्ये जर कोणाला प्रवेश करायचा असेल तर प्रत्येकाला शहरात शिरताना करोना चाचणी करावी लागेल. त्याचबरोबर काही दिवसांच्या क्वारंटाईनचेही नियम आहेत. त्यामुळे हा नियम आयपीएलच्या संघांना धोका पोहोचवू शकतो, असे म्हटले जात आहे.

यावर्षी युएईमधील आयपीएलचे सामने आबुधाबी, दुबई आणि शारजा या तीन ठिकाणी खेळवण्यात येणार आहेत. जर एखाद्या खेळाडूला किंवा संघाला दुबई किंवा शरजामधून जर आबुधाबीमध्ये जायचे असेल तर त्यांना शहराच्या सीमेवर करोनाची चाचणी करावी लागणार आहे. यासाठी किमान दीड तासाचा वेळ जातो. त्याचबरोबर शहरात प्रवेश करताना ४८ तासांमध्ये तुमचा करोनाचा अहवाल करोना निगेटीव्ह आला तरच तुम्हाला तिथे राहता येऊ शकते. त्याचबरोबर काही दिवस क्वारंटाइनही खेळाडूंना करावे लागू शकते.

याबाबत एका संघ मालकांनी सांगितले की, ” महेंद्रसिंग धोनी, विराट कोहली, रोहित शर्मासारख्या खेळाडूंना जर दीड तास रांगेत उभे राहावे लागत असेल तर ते चित्र कसे दिसेल. तिथे वेळ घालवण्यापेक्षा सर्वांची करोना चाचणी हॉटेलमध्ये घेण्यात यावी, अशी आम्ही मागणी केली आहे. कारण करोनाबाबतचे नियम सर्वांनीच पाळायला हवे आणि आम्ही ते पाळणारच आहोत. पण जर लीग यशस्वी करायची असेल तर चाचण्यांसंदर्भात काही बदल करण्यात यावेत, असे आम्हाला वाटते.”

जर आयपीएल सुरु असताना खेळाडूंना आबुधाबीला जायचे असेल आणि त्यांना शहरात जाण्यापूर्वी दीड तास रांगेत उभे राहून करोना चाचणी द्यावी लागली, तर त्यासाठी किती वेळ जाईल हे सांगता येत नाही. कारण प्रत्येक संघात ३० व्यक्ती तरी असतील. त्याचबरोबर जर आबुधाबीमध्ये गेल्यावर खेळाडूंना क्वारंटाइन राहावे लागले तर त्यांची लय बिघडू शकते. कारण क्वारंटाइन राहिल्यावर खेळाडूंना सराव करता येऊ शकणार नाही. याबाबत आयपीएल प्रशासकीय समितीचे अध्यक्ष ब्रिजेश पटेल हे युएईच्या सरकारबरोबर संवाद साधत आहेत.