मुंबई : पावसाने मुंबई शहराकडे पाठ फिरवली असली तरी शहराला पाणीपुरवठा करणाऱ्या ठाणे, नाशिक जिल्ह्यातील तलाव क्षेत्रांना काहीसा दिलासा दिला आहे. मुंबईला पाणीपुरवठा करणाऱ्या सातही तलावांतील पाणलोट क्षेत्रात गेल्या दोन-तीन दिवसांपासून पाऊस परतल्याने पाणीसाठा ९० (८९.६४) टक्क्यांवर पोहोचला आहे. सर्वाधिक पाणीपुरवठा करणाऱ्या ठाणे जिल्ह्यातील भातसा तलावातील पाणीसाठाही ८७ टक्क्यांवर पोहोचला असून, नाशिक जिल्ह्यातील अप्पर वैतरणा तलावात मात्र सर्वांत कमी म्हणजे ७७ टक्के इतका साठा झाला आहे.

मोडकसागर, तानसा, विहार, तुळशी हे चार तलाव सध्या भरले असून, अप्पर वैतरणा, मध्य वैतरणा व भातसा तलाव भरणे बाकी आहे. हे तलाव भरण्यासाठी किमान दीड लाख दशलक्ष लिटर पाण्याची आवश्यकता आहे. यापैकी भातसा तलाव भरण्यासाठी ९६ हजार दशलक्ष लिटर पाण्याची गरज आहे. मध्य वैतरणा सहा हजार दशलक्ष लिटर तर अप्पर वैतरणासाठी सरासरी ५० हजार दशलक्ष लिटर पाण्याची आवश्यकता असल्याचे जलअभियंता विभागाकडून सांगण्यात आले.

Monsoon 2023: राज्यात पावसाचा लपंडाव; अनेक जिल्ह्यांत भीषण पाणीटंचाई, सतराशे वाड्या-गावांमध्ये टँकर
दरम्यान, तलावांच्या पाणलोट क्षेत्रात दररोज सरासरी ४५ ते ५० मिमी पाऊस होत आहे. त्यामुळे पाण्याच्या पातळीतही गेल्या दोन-तीन दिवसांपासून वाढ होऊ लागली आहे. पाऊस नसल्यामुळे तानसा, मोडक सागर, विहार तलावातील पाण्याची पातळी घटू लागली होती. मात्र पाऊस सुरू झाल्यामुळे पुन्हा तलाव भरले आहेत. सोमवारी, २८ ऑगस्टला सातही तलावात मिळून १२ लाख ९७ हजार ४५२ दशलक्ष लिटर पाणीसाठा आहे. २०२१च्या तुलनेत हा साठा २० हजार दशलक्ष लिटरने जास्त आहे.

तर वर्षभर १० टक्के कपात?

सर्व सातही तलाव पूर्ण क्षमतेने भरण्यासाठी १४ लाख ४७ हजार ३६३ दशलक्ष लिटर पाण्याची आवश्यकता असते. १ ऑक्टोबरला तलाव १०० टक्के भरलेले असल्यास पालिकेला वर्षभर विनाकपात पाणीपुरवठा करणे शक्य होते. गेल्या १५ वर्षांत दोन वेळा तलाव ९० टक्केच भरल्याने वर्षभर १० टक्के पाणीकपात करावी लागली होती, याकडे जल विभागातील अधिकाऱ्यांनी लक्ष वेधले. पावसाचा आणखी एक महिना बाकी असून, या काळात समाधानकारक पाऊस पडल्यास कपात टळू शकते. अन्यथा वर्षभर १० टक्के कपातीला पर्याय नसल्याचे या अधिकाऱ्याने सांगितले.

तलावातील पिण्यायोग्य पाणीसाठा (दशलक्ष लिटरमध्ये)

अपर वैतरणा : १,७४,९९९

मोडक सागर : १,२८,९१०

तानसा : १,४३,७१०

मध्य वैतरणा : १,८७,४५१

भातसा : ६,६६,३८

विहार : २७,६९८

तुळशी : ८,०४६

शिर्डी लोकसभेवरुन घोलपांचे नाराजीनाट्य; वाकचौरेंच्या उमेदवारीला विरोध, ठाकरेंसमोर पेच

LEAVE A REPLY

Please enter your comment!
Please enter your name here