म. टा. प्रतिनिधी, सांगली: माहेरी गेलेली पत्नी नांदायला येत नसल्याच्या रागातून पतीने पत्नीशी वाद घातला. यावेळी वाद मिटवण्यासाठी आलेल्या सासूच्या डोक्यात लाकडी ओंडक्याने मारहाण करून जावयाने सासूचा खून केला. ही घटना वाळवा तालुक्यातील कारंदवाडी येथे शनिवारी पहाटे घडली. शालन रामचंद्र पाटील (वय ६५, रा. रोकडे गल्ली, कारंदवाडी) असे मृत सासूचे नाव आहे, तर जावई कृष्णा लहू खापरे (वय ४५, रा. बोलोली, ता. करवीर, जि. कोल्हापूर) याला अष्टा पोलिसांनी अटक केली.

आष्टा पोलिसांकडून मिळालेल्या माहितीनुसार कोल्हापूर जिल्ह्यातील बोलोली येथील कृष्णा खापरे याची पत्नी मंगल ही गेल्या काही दिवसांपासून माहेरी राहते. पतीसोबत वारंवार वाद होत असल्याने ती माहेरी आईजवळ राहत आहे. पत्नी नांदायला येत नसल्याने पती कृष्णा खापरे हा शुक्रवारी रात्री कारंदवाडी येथे आला होता. मध्यरात्रीच्या सुमारास तो पत्नीला शिवीगाळ आणि मारहाण करू लागला. यावेळी वाद मिटविण्यासाठी शालन पाटील मध्ये पडल्या. त्यांनी जावई कृष्णा खापरे याची समजूत काढण्याचा प्रयत्न केला. मात्र, त्याने हातातील लाकडी दांडक्याने सासू शालन यांच्या डोक्यात मारहाण केली. गंभीर जखमी अवस्थेतील शालन यांना उपचारासाठी खासगी रुग्णालयात दाखल केले. मात्र, उपचारापूर्वीच त्यांचा मृत्यू झाल्याचे डॉक्टरांनी स्पष्ट केले. या घटनेची माहिती मिळताच अाष्टा पोलिसांनी घटनास्थळी धाव घेऊन हल्लेखोर जावई कृष्णा खापरे याला अटक केली. त्याच्यावर खुनाचा गुन्हा दाखल करण्यात आला आहे. याबाबत दिलीप रामचंद्र पाटील (वय ४६, रा. कारंदवाडी, ता. वाळवा) यांनी फिर्याद दिली.

Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times

LEAVE A REPLY

Please enter your comment!
Please enter your name here