वाचा:
मुख्यमंत्र्यांच्या मातोश्री या खासगी निवासस्थानी आज सकाळी ११ वाजताच्या सुमरास धमकीचा कॉल आला. काही वेळेच्या अंतराने मातोश्रीच्या लँडलाइन फोनवर तीन ते चार कॉल आल्याचे सांगण्यात येत आहे. ज्या व्यक्तीने कॉल केला होता ती व्यक्ती आपण दुबईतून बोलत आहे. मला मुख्यमंत्र्यांशी बोलायचे आहे. मी दाऊद इब्राहिमचा माणूस आहे, असा दावा करत होती. उद्धव ठाकरे यांना जीवे मारण्याची तसेच मातोश्री निवासस्थान बॉम्बस्फोट घडवून उडवून देण्याची धमकीही या व्यक्तीने दिल्याचे सांगण्यात येत आहे. या घटनेचे तीव्र पडसाद पाहायला मिळाले.
वाचा:
राज्य मंत्रिमंडळाच्या बैठकीत यावर गहन चर्चा करण्यात आली. मातोश्री निवासस्थान बॉम्बने उडवून देण्याच्या निनावी धमकीबद्धल मंत्रिमंडळ बैठकीत चिंता व्यक्त करण्यात आली तसेच या कृतीचा तीव्र निषेधही करण्यात आला. हे प्रकरण खूप गंभीर असून केंद्र सरकारने देखील याची तातडीने दखल घ्यावी व यामागे जे कुणी असतील त्यांना शोधून कठोर शासन करावे, अशा तीव्र भावना मंत्रिमंडळाने व्यक्त केल्या. यावेळी गृहमंत्री यांनी यासंदर्भात गुन्हे शाखेने कसून तपास सुरू केला आहे, अशी माहिती दिली.
दाऊदच्या धमक्यांना शिवसेना घाबरत नाही
मातोश्री निवासस्थानी धमकीचा फोन आल्यानंतर तीव्र प्रतिक्रिया उमटत आहेत. शिवसेनेच्या अनेक नेत्यांनी यावर आपल्या संतप्त प्रतिक्रिया दिल्या. नगरविकास मंत्री एकनाथ शिंदे यांनी तर दाऊदच काय त्याच्या सात पिढ्या खाली आल्या तरी कुणी मातोश्रीचे वाकडे करू शकणार नाही, असे सांगितले. मातोश्री निवासस्थान हे मराठी माणसासाठी सन्मानाचे स्थान आहे. त्यामुळे दाऊदच काय मातोश्रीला धक्का पोहचवण्याची हिंमत तो ज्याच्या आश्रयाला आहे तो पाकिस्तानही करू शकणार नाही. दुसऱ्या देशात लपून बसलेल्या दाऊदच्या अशा पोकळ धमक्यांना शिवसेना घाबरत नाही, असेही शिंदे म्हणाले. मुंबईच्या महापौर किशोरी पेडणेकर यांनीही या कॉलवर तीव्र प्रतिक्रिया नोंदवली.
वाचा:
Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times
