प्रतिनिधी छत्रपती संभाजी नगर: परीक्षेत परीक्षार्थींना उत्तरे पुरवणारे रॅकेट छत्रपती संभाजीनगर शहरातील सिडको एमआयडीसी पोलिसांनी उघडकीस आणला आहे. परीक्षा घेणाऱ्या टीसीएस या कंपनीच्या दोन कंत्राटी कामगारांनी हाउसकीपिंगचे काम करणाऱ्या महिलेला पैशाची लालूच देऊन परीक्षा सुरू असताना परीक्षार्थींना कागदावर उत्तरे लिहून देत उमेदवारांना कॉपी पुरवल्याचा प्रकार उघडकीस आला आहे. याप्रकरणी चार आरोपींना पोलिसांनी बेड्या ठोकल्या आहेत.याबाबत अधिक माहिती अशी की, छत्रपती संभाजीनगर जिल्ह्यातील चिकलठाणा येथे आय ऑन परीक्षा केंद्राबाहेरून परीक्षार्थी असलेल्या उमेदवारांना उत्तरे पुरवणाऱ्या राजू भीमराव नागरे याला पोलिसांनी अटक केली होती. नागरे याच्या मोबाईलमधून एक महत्त्वाची माहिती समोर आली आहे, यामध्ये परीक्षा केंद्रावर टीसीएस तर्फे कंत्राटी पर्यवेक्षक म्हणून नेमलेल्या दोन कर्मचाऱ्यांसह एका महिलेचा समावेश या रॅकेटमध्ये असल्याचे समोर आले आहे. यामध्ये शाहरुख युनूस शेख (वय २७ रा. वैजापूर) पवन सुरेश शिरसाट (वय 26 राहणार सिडको) बाली रमेश हिवराळे (वय 30 रा. ब्रिज वाडी) या आरोपींना पोलिसांनी ताब्यात घेतले आहे. तर विकी रोहिदास सोनवणे (वय ३०च रा. चौका) याच्या नावावर सिम कार्ड असलेल्या आरोपीला अटक केली आहे. या रॅकेटमध्ये सक्रिय असलेली महिला आरोपी बाली हिवराळे ही सेंटरवर स्वच्छतेचे काम करते. प्रत्येकाची कसून चौकशी होत असताना महिला असल्यामुळे महिलेची कसून चौकशी होत नव्हती यामुळे बाली हिराळेही मोबाईल सोबत नेत असे. परीक्षा केंद्रावरील दुसऱ्या मजल्यावर असलेल्या शौचालयामध्ये जाऊन ती मोबाईल मध्ये आलेली उत्तरे कागदावर लिहून ती कंत्राटी पर्यवेक्षकाकडे नेऊन देत असे. यातील पवन शिरसाठ टीसीएसचा कंत्राटी कर्मचारी असल्याने त्याच्या मामाची मुलगी हाउसकीपिंगसाठी कामावर होती. तो हाउसकीपिंग काम करणाऱ्या बालीकडे जाऊन उत्तर लिहिलेली चिठ्ठी परीक्षार्थींना आणून देत होता.उत्तरे पुरवण्यासाठी मास्टर कार्डचा वापर…तलाठी भरती परीक्षे मध्ये सर्वात पहिली अटक करण्यात आलेल्या राजू नागरे याच्या ताब्यातून पोलिसांनी एटीएमसारखा दिसणारे एक उपकरण हस्तगत केले आहे त्याला मास्टर कार्ड असे म्हटले जाते. या मास्टरकार्ड मध्ये सिमकार्ड टाकण्याची व्यवस्था आहे तसेच मास्टर कार्ड हे तिघांकडे असण्याची शक्यता देखील पोलिसांनी वर्तवली आहे.
