व्हॉट्सअॅप ग्रुपमधील मुलांची ओळख पटली

जवाहरलाल नेहरू विद्यापीठातील (जेएनयू) हिंसाचारादरम्यान ५ जानेवारीला तयार करण्यात आलेल्या व्हॉट्‌सअॅप ग्रुपमधील ३७ विद्यार्थ्यांची ओळख दिल्ली पोलिसांनी निश्चित केली आहे, अशी माहिती सूत्रांनी दिली. ओळख निश्चित झालेल्या व्यक्ती डाव्या किंवा उजव्या अशा कोणत्याही संघटनेशी संबंधित नसल्याचे सूत्रांनी सांगितले.

ओळख निश्चित झालेल्या व्यक्ती विद्यार्थी असून, सेमिस्टर नोंदणी प्रक्रियेला त्यांचे समर्थन होते. त्यांना या प्रक्रियेत स्वत:चे नाव नोंदवायचे होते, असेही सूत्रांनी सांगितले. ‘जेएनयू’मध्ये झालेल्या हिंसाचाराच्या पार्श्वभूमीवर तयार करण्यात आलेला ‘युनिटी अगेन्स्ट लेफ्ट’ हा व्हॉट्‌सअॅप ग्रुप पोलिस तपासाच्या रडारवर आला होता, असे पोलिसांनी शुक्रवारी सांगितले होते.

विजनय यांनी घेतली आयशी घोषची भेट

केरळचे मुख्यमंत्री पिनराई विजयन यांनी जेएनयू विद्यार्थी संघटनेची अध्यक्ष आयशी घोष हिची भेट घेतली. शुल्कवाढ; तसेच नागरिकत्व दुरुस्ती कायद्याच्या विरोधातील आंदोलनामध्ये संपूर्ण देश तुमच्यासोबत आहे, असेही विजयन यांनी आयशीला सांगितले. नवी दिल्लीतील केरळ हाउस येथे त्यांनी आयशी घोषची भेट घेतली. ‘हल्ला बोल : द डेथ अँड लाइफ ऑफ सफदर हाशमी’ हे सुधन्वा देशपांडे लिखित पुस्तकही विजयन यांनी आयशीला भेट दिले. पाच जानेवारीला जेएनयूमध्ये झालेल्या हल्ल्यात आयशी घोष जखमी झाली होती. ‘जेएनयूचे विद्यार्थी संघ परिवाराच्या विरोधात मोठी लढाई लढत आहेत,’ असे पिनराई विजयन यांनी फेसबुक पोस्टमध्ये म्हटले आहे.