म. टा. प्रतिनिधी, पुणे : पुण्याचे कारभारी कोण, याचे उत्तर देण्यासाठी उपमुख्यमंत्री अजित पवार आणि पालकमंत्री चंद्रकांत पाटील हे दोन्हीही नेते सरसावले असून, दोघांकडूनही विकासकामांच्या आढावा बैठकांचा सपाटा लावण्यात आला आहे. उपमुख्यमंत्री पवार यांच्या बैठकांच्या राउंडनंतर पालकमंत्री पाटील यांनी आता विधानसभा मतदारसंघनिहाय विकासकामांचा आढावा घेण्यास सुरुवात केली आहे. ‘व्हीआयपी’ विश्रामगृह येथे आज, बुधवारी पर्वती आणि खडकवासला विधानसभा मतदारसंघांचा आढावा घेण्यात येणार आहे.

उपमुख्यमंत्री पवार आणि पालकमंत्री पाटील यांच्यातील शीतयुद्धाच्या वणव्याचे चटके जिल्ह्यातील प्रशासनास बसत आहेत. जिल्हा नियोजन मंडळाच्या बैठकीतील (डीपीडीसी) ४०० कोटी रुपयांच्या विकास कामांना साडेतीन महिन्यांनंतरही मंजुरी मिळालेली नाही. पालकमंत्री पाटील यांनी याबाबत थेट मुख्यमंत्री एकनाथ शिंदे यांच्याकडे तक्रार केल्यानंतरही त्याची साधी दखल घेण्यात आलेली नाही. त्यानंतर उपमुख्यमंत्री पवार यांच्या पुण्यातील बैठकाही पार पडल्या असून, राष्ट्रवादी काँग्रेसकडून शहरात शक्तिप्रदर्शनही करण्यात आले. गेला आठवडा पवार यांनी गाजवल्यानंतर या आठवड्यात पाटील यांच्या बैठकांचा सपाटा असणार आहे. पाटील यांनी शहरातील आठही विधानसभा मतदारसंघाच्या आढावा बैठका आयोजित करण्यात आल्या आहेत. पर्वती आणि खडकवासला या विधानसभा मतदारसंघातील प्रलंबित प्रश्नासंदर्भात आढावा घेण्यात येणार आहे. त्यानंतर टप्प्याटप्प्याने सर्वच विधानसभा मतदारसंघांच्या अनुषंगाने बैठका होतील, असा दावा सूत्रांनी केला आहे.

चांगली बातमी! १६ ते १९ सप्टेंबरला राज्यात पावसाचा जोर वाढणार, पाहा तुमच्या शहरात पाऊस कधी

अजित पवार राज्याच्या सत्तेत सहभागी होण्यापूर्वी मे महिन्यात जिल्हा नियोजन मंडळाची बैठक झाली होती. या बैठकीस राष्ट्रवादी काँग्रेसचे अध्यक्ष शरद पवार उपस्थित होते. या वेळी सुमारे ४०० कोटी रुपयांच्या कामांना मंजुरी देण्यात आली. या बैठकीचे इतिवृत्त एक जुलै रोजी जिल्हा प्रशासनाकडे मंजुरीसाठी पाठविण्यात आले. मात्र, दोन जुलै रोजी अजित पवार उपमुख्यमंत्राची शपथ घेत सत्तेत सहभागी झाले. तेव्हापासून ते इतिवृत्त बराच काळ जिल्हा प्रशासनाकडे मंजुरीअभावी रखडले आहे. केंद्र सरकारने संसदेचे अधिवेशन बोलावले आहे. या अधिवेशनात ‘एक देश एक निवडणूक’ असा निर्णय झाला आणि निवडणुका तातडीने होणार असल्या तर हा निधी खर्च होणार नाही. पर्यायाने विकास कामे रखडणार असल्याची भीती व्यक्त करण्यात येत आहे.

दरम्यान, मुख्यमंत्री एकनाथ शिंदेसमर्थक असलेले माजी खासदार शिवाजीराव आढळराव, माजी मंत्री विजय शिवतारे यांनीही मुख्यमंत्र्यांकडे आवश्यक निधी मिळत नसल्याची तक्रार केली आहे.

LEAVE A REPLY

Please enter your comment!
Please enter your name here