लिंक रोडचे काम ‘एमएमआरडीए’कडे, तर एलबीएस विस्ताराचे काम मुंबई महापालिकेकडे आहे. बीकेसी येथील एमटीएनएल जंक्शनपासून बांधण्यात आलेला पूल हा एलबीएस जंक्शनच्या सुमारे १०० मीटर आधी सांताक्रुझ-चेंबूर लिंक रोडवरील सध्या अस्तित्वात असलेल्या पुलामध्ये विलिन होतो. ‘एमएमआरडीए’मार्फत बांधण्यात आलेल्या पुलाचा विस्तार करून तो एलबीएस रोडपर्यंत करून घाटकोपरकडे जाणाऱ्या मार्गाला जोडण्यात यावा, अशी मागणी स्थानिकांमार्फत करण्यात येत होती. प्रस्तावित पुलाच्या बांधकामामुळे बीकेसीमधून येणाऱ्या वाहनांना तीन सिग्नल टाळून एलबीएसमार्गे घाटकोपरकडे जाणे सोयीचे होणार आहे. तसेच वेळ व इंधनाचीही बचत होणार आहे. त्यानुसार विस्ताराचे काम पालिका करणार आहे. यासाठी निविदा काढण्यात आली असून, ३६ कोटी ४८ लाख रुपयांचा खर्च अपेक्षित आहे.
गणेशोत्सवात कोकणात जाणाऱ्यांसाठी मोठा दिलासा; आणखी चार रेल्वे गाड्यांना वाढीव डबे
हे काम सुरू करण्याआधी पालिका आयुक्त चहल यांची मंजुरी आवश्यक असून, तसा प्रस्ताव त्यांच्याकडे पाठवण्यात आला होता. त्यानुसार मसुदापत्राच्या प्रस्तावाला मंजुरी मिळाली आहे. मात्र या विस्ताराच्या कामात बांधकामांचा अडथळा ठरणारी पाच मोठी व्यावसायिक बांधकामे दुसरीकडे स्थलांतरित करावी लागणार आहेत. ही कार्यवाही पूर्ण केल्यानंतरच विस्तार होणे शक्य आहे. त्यासाठीची कार्यवाही पालिकेच्या कुर्ला या एल वॉर्डकडून केली जाणार आहे. यासाठीही वॉर्डस्तरावर चर्चा केली जात असल्याची माहिती सूत्रांनी दिली. हे काम पावसाळा वगळून २४ महिन्यांत केले जाणार आहे.
९० टक्के काम पूर्ण
मुंबईच्या वाहतुकीचा महत्त्वाचा भाग असलेल्या दोन द्रुतगती मार्गांना विनाथांबा, विनासिग्नल जोडण्यासाठी सांताक्रुझ-चेंबूर लिंक रोडचे काम ‘एमएमआरडीए’ने २०१४मध्ये सुरू केले. हा मार्ग पश्चिमेकडे वाकोला येथून सुरू होऊन चेंबूरमधील अमर महल जंक्शन येथे संपतो. या मार्गावर बीकेसी ते एलबीएसदरम्यानचा उड्डाणपूल महत्त्वाचा आहे. तो बीकेसीतील एमटीएनल एक्स्चेंजजवळून सुरू होतो आणि एलबीएस मार्गाजवळ येऊन संपतो. या लिंक रोडचे काम ९० टक्के पूर्ण झाले आहे, तर विस्तारीकरणाचे काम अद्याप बाकी आहे.
