Manoj Jarange Patil: मनोज जरांगेंच्या उपोषणाची सांगता; एकनाथ शिंदे कोंडी फोडण्यात यशस्वी
मुख्यमंत्री एकनाथ शिंदे यांनी आपल्या भाषणाची सुरुवात मनोज जरांगे यांच्या वडिलांना उद्देशून केली. त्यांनी जरांगे-पाटलांच्या वडिलांना म्हटले की, तुझा पोरगा भारी आहे. स्वत:साठी नाही समाजासाठी लढतोय. मनोजला मी अनेक वर्षे ओळखत आहे. त्याने वैयक्तिक फायद्यासाठी कोणता प्रश्न मांडला नाही. जेव्हा जेव्हा मला भेटला तेव्हा मराठा आरक्षणाबद्दल त्याने सरळ भूमिका मांडली. मी मनोजला मनापासून शुभेच्छा देतो, त्यांचं अभिनंदन करतो. कारण एखादं आंदोलन करणं, आमरण उपोषण करणं आणि जिद्दीने आणि चिकाटीने ते पुढे नेणं, ही सोपी गोष्ट नाही. एखाद्या आंदोलनाला महाराष्ट्रात अशाप्रकारचा प्रतिसाद मिळणे, ही गोष्ट खूप कमीवेळा पाहायला मिळते. पण ज्यांचा हेतू शुद्ध आणि प्रामाणिक असतो, त्यांच्या पाठिशी जनता उभी राहतेच. मी भेटायला आल्यानंतर मनोज जरांगे यांनी माझ्या विनंतीला मान देऊन उपोषण मागे घेतले, यासाठी मी त्यांचा आभारी आहे, असे एकनाथ शिंदे यांनी म्हटले.
हा विश्वासघात झाला… ‘बोलून मोकळं व्हायचं’वेळी फडणवीसांशी काय बोलणं झालं? शिंदेंनी सगळंच सांगितलं
मराठा आंदोलकांवरील लाठीमाराच्या घटनेबाबत मुख्यमंत्र्यांचं भाष्य
यावेळी एकनाथ शिंदे यांनी अंतरवाली सराटी येथे मराठा आंदोलकांवर पोलिसांकडून करण्यात आलेल्या लाठीमारासंदर्भात भाष्य केले. लाठीमाराची घटना ही दुर्दैवी होती. स्वत: गृहमंत्री देवेंद्र फडणवीस यांनी जाहीर माफी मागितली. मी त्या बैठकीत खंत आणि संवेदना व्यक्त केली. मराठा समाज हा शिस्तप्रिय आणि संवेदनशील आहे. यापूर्वी मराठा समाजाने लाखोंचे मोर्चे शांततेत काढले. लाठीमाराच्या घटनेत ज्या पोलीस अधिकाऱ्यांच्या दोष होता त्यांना तात्काळ निलंबित करण्यात आले. तसे आंदोलकांवरील गुन्हे मागे घेण्याची प्रक्रिया तातडीने पूर्ण करण्याचे आदेश मी दिले आहेत, असे एकनाथ शिंदे यांनी म्हटले.
