मुख्यमंत्री शिंदे काही दिवसांपूर्वी माझगाव डॉक येथून एका कार्यक्रमाहून परतत असताना या भागातील अस्वच्छता पाहून त्यांनी पालिका आयुक्त इक्बालसिंह चहल यांच्याकडे नाराजी व्यक्त केली होती. ‘मुंबईतील सर्व रस्ते, गल्लीबोळ, छोटे रस्ते स्वच्छ करा, मुंबईत कुठेही रस्त्यावर कचरा दिसता कामा नये. राडारोडा आणि कचरा त्वरित हटवा, यासाठी पालिकेचे सर्व सहायक आयुक्त, स्वच्छता निरीक्षक, स्वच्छता कर्मचारी या सर्व यंत्रणांना कामाला लावा’, असे आदेश त्यांनी यावेळी दिले होते. पालिका प्रशासनातर्फे याची गांभीर्याने दखल घेत दोन अधिकाऱ्यांवर कारवाईचा निर्णय घेण्यात आला. तसेच, स्वच्छता मोहीम वेगाने सुरू करण्याचे निर्देश प्रभाग कार्यालयांना देण्यात आले आहेत.
गणेशोत्सव मंडळांसाठी आनंदाची बातमी; मुख्यमंत्री एकनाथ शिंदेंनी घेतला मोठा निर्णय, ५ वर्षांसाठी एकदाच घ्यावी लागणार परवानगीपालिका आयुक्‍तांच्‍या निर्देशानुसार, परिमंडळ सहआयुक्‍त/उपायुक्त, सर्व विभागांचे सहायक आयुक्त दररोज आपापल्‍या कार्यक्षेत्रात किमान दोन तास पाहणीदौरे करत आहेत. क्षेत्रवार दौरे केल्यानंतर पाहणीमध्ये केलेल्या स्वच्छताविषयक सूचनांच्या पूर्ततेची पुनर्तपासणी केली जात आहे. स्वच्छता ही नियमित बाब असून, त्यामध्ये सातत्य राखले जायला हवे, या सूत्रानुसार पालिकेचे अधिकारी-कर्मचारी ‘चकाचक मुंबई’साठी अहोरात्र प्रयत्न करत आहेत. पालिकचे उपायुक्त, सहायक आयुक्त ‘ऑन द स्‍पॉट’ भेटी देत मुख्‍य रस्ते, हमरस्‍त्‍यांसह अगदी गल्लीबोळात जाऊन तेथील दैनंदिन स्वच्छता कामांची प्रत्‍यक्ष पाहणी करीत आहेत, अशी माहिती उपायुक्त (घनकचरा व्यवस्थापन) चंदा जाधव यांनी दिली.
सर्व २४ विभागांत गुरुवारी स्वच्छता कर्मचाऱ्यांनी ‘सामूहिक स्वच्छता’ उपक्रम राबवून लहान रस्ते, गल्ली आदींमध्ये स्वच्छता केली. ग्रँट रोड डी विभागांतर्गत के. के. मार्ग, गोलपीठा, आर्देशीर मार्ग, आर. एस. निमकर परिसर, ताडदेव सर्कल, नेताजी सुभाषचंद्र रस्‍ता, डी. बी. रस्‍ता, केनेडी उड्डाणपूल या ठिकाणीही स्वच्छता करण्यात आली. गोरेगाव पी दक्षिण विभागात हायपर सिटी, सिबा रस्‍ता, आरे चेक नाका, रेमी कंपाऊंड, मिलिंद म्‍हात्रे रस्‍ता, केशव गोरे मार्ग, श्रीरंग साबडे मार्ग, जवाहर नगर रस्‍ता, अशोकनगर तर, परळ एफ दक्षिण विभागामध्ये जेरबाई वाडिया रस्‍ता, भोईवाडा परिसर, डॉ. वाळिंबे मार्ग, पटेलवाडी परिसर, जेरबाई वाडिया रस्‍ता, भोईवाडा परिसर, डॉ. ई बोर्जेस मार्ग, सुपारीबाग परिसर, शिवडी छेद रस्‍ता झोपडपट्टी परिसर, झकेरिया परिसर, महात्मा फुले मार्ग, नायगाव परिसर या विभागात स्वच्छता अभियान राबविले. मुंबई उपनगरांमध्येही कर्मचाऱ्यांनी विविध ठिकाणी स्वच्छता मोहीम राबवली.
