'अभिमानाने सांगा मनसे नेमकं काय करतेय'… व्हिडिओ व्हायरल

मुंबई: राज्यात सुशांतसिंग राजपूत आत्महत्याप्रकरण आणि कंगनाप्रकरणावर वाद सुरू असतानाच नेमकं काय करत आहे? असा प्रश्न राज्यातील जनतेला पडला असून त्याला मनसेनेचं एका व्हिडिओच्या माध्यामातून उत्तर दिलं आहे. ‘अभिमानाने सांगा मनसे नेमकं काय करतेय’, अशी टॅग लाइन घेऊन मनसेने हा व्हिडिओ व्हायरल केला आहे.

या साडेपाच मिनिटाच्या व्हिडिओत लॉकडाऊनमध्ये मनसेने नेमकं काय काम केलं त्याचा लेखाजोखा मांडला आहे. मनसेच्या त्या त्या क्षेत्रात काम करणाऱ्या पदाधिकाऱ्यांनी त्यांच्या क्षेत्रात केलेल्या कामाची थोडक्यात माहिती दिली आहे. मनसेच्या सरचिटणीस रिटा गुप्ता यांनी लॉकडाऊनमध्ये मनसेने अन्नपुरवठा आणि पीपीई किट दिल्याचं सांगितलं. तर मनसेचे माजी नगरसेवक संतोष धुरी यांनी मनसेने मुंबई पालिकेच्या कंत्राटी कामगारांना सुरक्षा कवच आणि ३०० रुपये प्रोत्साहन भत्ता मिळवून दिल्याचं सांगितलं. मनसेच्या सहकार सेनेचे अध्यक्ष दिलीप धोत्रे यांनी शेतकऱ्यांना बी-बियाणे आणि मोफत खते देण्याचं काम केल्याचं या व्हिडिओतून सांगितलं आहे. तर, मनसेचे नवी मुंबई शहराध्यक्ष गजानन काळे यांनी कोविड काळात लाखोची बिले वसूल करणाऱ्या खासगी रुग्णालयांना दणका देत ही बिले कमी केल्याचं सांगितलं. तसेच रुग्णांना तातडीने बेड्स उपलब्ध करून दिल्याचंही स्पष्ट केलं.

मनसेचे सरचिटणीस संदीप देशपांडे यांनी गणपतीत कोकणात जाणाऱ्या चाकरमान्यांना मोफत बसेस उपलब्ध करून दिल्याचं स्पष्ट केलं. तर मनसे या संकटाच्या काळात चित्रपट आणि नाट्यसृष्टीच्यापाठी ठामपणे उभी राहिल्याचं अमेय खोपकर यांनी सांगितलं. मनसे नेते अभिजीत पानसे यांनी मनसेने लहान मुलांच्या पाठीवरच्या दप्तराचं ओझं कमी केल्याचं निदर्शनास आणून दिलं. माजी आमदार नितीन सरदेसाई यांनी अत्यावश्यक सेवेतील कर्मचाऱ्यांप्रमाणेच इतरांनाही लोकलमध्ये प्रवास करण्यास मुभा मिळावी म्हणून प्रयत्न करत असल्याचं सांगितलं. याशिवाय बाळा नांदगावकर यांनीही मनसेने केलेल्या कामाची जंत्रीच सादर केलीय. बेरोजगारांना रोजगार मिळवून देणे, गोरगरीबांना अन्नधान्य देणे, पुण्यात ११ अॅम्ब्युलन्स उपलब्ध करून देणे, नगरमध्ये भाजीपाला आणि बियाणांचा पुरवठा, बेस्ट कर्मचाऱ्यांना सॅनिटायझर आणि मास्कचं वाटप. वीज दरवाढी विरोधात आंदोलन, वाहतूकदारांना त्रास देणाऱ्या फायनान्स कंपन्यांविरोधात आक्रमक भूमिका आणि मंदिर प्रवेश मिळावा म्हणून घेतलेली भूमिका आदी कामांचा उल्लेखही मनसेच्या या व्हिडिओत करण्यात आला आहे.

कुणाशीही बरोबरी नाही: राज
या व्हिडिओत सर्वात शेवटी मनसेचे अध्यक्ष यांचं मनोगत दाखवण्यात आलं आहे. मी कुणाचीही बरोबरी किंवा तुलना करत नाही. पण माझ्या मनसे सैनिकांनी गेल्या चार महिन्यात प्रचंड काम केलं. लोकांना दोन वेळाचा डबा आणि चहा देण्यापासून ते त्यांची औषधपाण्याची सोय करण्यासाठी माझा मनसे सैनिक रस्त्यावर उतरला होता, असं राज ठाकरे यांनी म्हटलं आहे.