नवी दिल्ली: डाव्या विचारधारेशी जोडलेल्या संघटना आणि कार्यकर्त्यांनी शिक्षण क्षेत्रातील वातावरण बिघडवलं आहे, असा आरोप शैक्षणिक क्षेत्रातील २००हून अधिक तज्ज्ञमंडळी आणि प्रतिष्ठित विद्यापीठांच्या कुलगुरूंनी पंतप्रधान नरेंद्र मोदींना लिहिलेल्या पत्राद्वारे केला आहे. देशातील शैक्षणिक वातावरण दूषित केलं जात आहे, असं , जामिया, एएमयू आणि जाधवपूर विद्यापीठातील अलीकडच्या घटनांमधून दिसून येतं, असंही या पत्रात नमूद करण्यात आलं आहे.

देशभरातील अनेक प्रतिष्ठित विद्यापीठांतील कुलगुरू आणि शैक्षणिक क्षेत्रातील तज्ज्ञ अशा एकूण जवळपास २०८ जणांनी पंतप्रधान नरेंद्र मोदींना पत्र लिहिलं आहे. डाव्या विचारधारेशी संबंधित संघटना आणि कार्यकर्त्यांनी देशातील शैक्षणिक वातावरण बिघडवलं आहे, असा आरोप त्यात करण्यात आला आहे. डाव्या संघटनांमधील काही कार्यकर्ते देशातील शैक्षणिक वातावरण दूषित करण्याचा प्रयत्न करत आहेत, असं त्यात म्हटलं आहे. ‘विद्यार्थी राजकारणाच्या नावाखाली अजेंडा राबवत आहेत, असं आम्हाला वाटतं. अलीकडेच जेएनयूपासून ते जामिया आणि एएमयूपासून जाधवपूर विद्यापीठातील घडलेल्या घटनांमधून दिसतं की कशा प्रकारे शैक्षणिक वातावरण खराब केलं जात आहे. यामागे डाव्या संघटनांमधील कार्यकर्ते आहेत,’ असंही पत्रात नमूद करण्यात आलं आहे.

पंतप्रधान मोदींना पत्र लिहिणाऱ्यांमध्ये हरि सिंह गौर विद्यापीठाचे कुलगुरू आर. पी. तिवारी, साऊथ बिहार सेंट्रल विद्यापीठाचे कुलगुरू एचसीएस राठोड, सरदार पटेल विद्यापीठाचे कुलगुरू शिरीष कुलकर्णी यांचा समावेश आहे. ‘शैक्षणिक संस्थानांमध्ये डाव्या संघटनांच्या आराजकतेविरोधात निवेदन’ या शिर्षकाखाली हे पत्र लिहिलं आहे. त्यावर २०८ शिक्षणतज्ज्ञांच्या स्वाक्षऱ्या आहेत.

‘देशविरोधी घोषणा देणाऱ्यांना तुरुंगात टाकणार’

तत्पूर्वी, भाजप अध्यक्ष आणि केंद्रीय गृहमंत्री अमित शहा यांनी जबलपूरमधील सभेत बोलताना जेएनयूतील आंदोलनाबाबत भाष्य केलं. जेएनयूमध्ये देशविरोधी घोषणा देणाऱ्यांना तुरुंगात टाकायला हवं की नको, अशी विचारणा त्यांनी सभेला उपस्थित असणाऱ्या जनतेला केली. त्यानंतर राष्ट्रविरोधी घोषणा देणाऱ्यांना तुरुंगात टाकलं जाईल, असा इशारा त्यांनी दिला. काँग्रेस नेते राहुल गांधी आणि दिल्लीचे मुख्यमंत्री अरविंद केजरीवाल हे देशविरोधी घोषणा देणाऱ्यांना वाचवायचा प्रयत्न करत आहेत, अशी टीकाही शहा यांनी केली.