फ्लिपकार्टमध्ये मेगाभरती; ७० हजारांना मिळणार रोजगाराची संधी

वृत्तसंस्था, बेंगळुरू : वॉलमार्टचा भाग असलेल्या फ्लिपकार्टने सध्याच्या बिकट परिस्थितीतही ७० हजार रोजगार निर्माण करण्याचा संकल्प मंगळवारी केला. त्याचप्रमाणे देशात व्यवसायविस्तारासाठी अनेक नवे डिलिव्हरी पार्टनर्स तयार करण्याचेही प्लिपकार्टने ठरवले आहे. यासाठी देशातील ५० हजार किराणा दुकानांनाही संलग्न करून घेणार आहे. सणासुदीच्या दिवसांमध्ये ऑनलाइन खरेदीत होणारी वाढ लक्षात घेता फ्लिपकार्टने ही सर्व योजना आखली आहे, ज्यातून मोठ्या प्रमाणावर रोजगारनिर्मिती होणार आहे.

करोना काळात लोक प्रत्यक्ष बाजारात जाऊन खरेदी करणे टाळत आहेत. याला पर्याय म्हणून ऑनलाइन खरेदीने जोर धरला असून हा व्यवसाय मोठ्या प्रमाणावर विस्तारत आहे. या व्यवसायाचा लाभ उठवण्यासाठी फ्लिपकार्ट, अॅमेझॉन, रिलायन्स इंडस्ट्रीजचा ई-कॉमर्स व्यवसाय अशा सर्वच ई-कॉमर्स कंपन्या सरसावल्या आहेत.

फ्लिपकार्टने यासंदर्भात प्रसिद्ध केलेल्या निवेदनात म्हटले आहे की, या ७० हजार रोजगारांमध्ये डिलिव्हरी एक्झिक्युटिव्ह, पिकर्स, पॅकर्स आणि सॉर्टर्स या प्रकारच्या रोजगांराचा प्रामुख्याने समावेश असणार आहे. या रोजगारांमुळे संलग्न होणाऱ्या दुकानांतूनही अप्रत्यक्ष रोजगारनिर्मिती होणार आहे. याच महिन्याच्या सुरुवातीला फ्लिपकार्टने ऑनलाइन घाऊक विक्री सेवा सुरू केली होती. याचा फायदा किराणा दुकानदार, वाणी आणि छोटे व्यापारी यांना होत आहे.