मुंबईः मुंबई व उपनगरात संध्याकाळपासूनच जोर धरल्यानं अनेक सखल भागात पाणी साचले असून मुंबईकरांची दाणादाण उडाली आहे. मंगळवारपासून मुंबईत तब्बल २८६.४ मिमि पावसाची नोंद झाली आहे. या पावसाची गणना अतिवृष्टीमध्ये केली जाते. मुंबईच्या पावसाने केलेल्या फटकेबाजीने नवा विक्रम रचला आहे.

सप्टेंबर महिन्यात कोसळलेल्या पावसानं गेल्या अडीच दशकांमध्ये पहिल्यांदाच फक्त २४ तासांत मुंबईत सर्वाधिक पाऊस कोसळला आहे. या पावसानं २६ वर्षांपूर्वीचा विक्रम मोडला आहे. १९९४ ते २०२० या कालावधीत सप्टेंबर महिन्यात दुसऱ्यांदा एका दिवसात मुंबईत इतका पाऊस पडला. त्याचबरोबर, १९७४- २०२० दरम्यान सप्टेंबर महिन्यात २४ तासांत सर्वाधिक पाऊस पडण्याची ही चौथी वेळ आहे. मंगळवारी कोसळलेल्या या पावसानं मुंबईकरांच जनजीवन विस्कळीत केलं आहे.

मंगळवारी सकाळी ८.३० ते बुधवारी ५. ३०पर्यंत मुंबईत २८६.४ मिमि पावसाची नोंद झाली आहे. याच दरम्यान, दक्षिण मुंबईत म्हणजेच कुलाब्यात १४७.८ मिमि पाऊस पडला. तर, मंगळवारी संध्याकाळी ५.३० ते ११.३० या सहा तासांच्या कालावधीत मुंबईत १०७ मिमि पावसाची नोंद झाली आहे. तर, रात्री ११.३० ते ५.३० या सहा तासांमध्ये दक्षिण मुंबईत ८९ मिमि पावसाची नोंद झाली आहे.

मंगळवारी सायंकाळनंतर पावसाचा जोर वाढला आहे. सुमारे तीन तास सर्वत्र पाऊस झाल्यानं सखल भागात पाणी भरले आहे, तर अनेक भागांत रस्ते जलमय झाले आहे. मध्य रेल्वे मार्गावरील सायन स्टेशन येथे मोठ्या प्रमाणात पाणी साचले असून रेल्वेरूळ पूर्णपणे पाण्याखाली गेले आहेत. सायनजवळ लोकल खोळंबल्याने अनेक प्रवाशांची कोंडी झाली आहे. सध्या केवळ अत्यावश्यक सेवांमधील कर्मचाऱ्यांसाठी विशेष लोकल चालवल्या जात आहेत. त्यामुळे प्रवाशांची संख्या कमी असली तरी उपनगरांच्या दिशेने जाणारे प्रवासी सायन स्टेशनमध्ये अडकून पडले आहेत.

मुंबईत आजही रात्रभर पावसाचा जोर कायम राहणार असण्याची शक्यता वर्तवण्यात आली आहे. मात्र सप्टेंबर महिना संपायला काहीच दिवस शिल्लक आहेत. तसेच अजून परतीच्या पावसालाही सुरुवात झालेली नाही. त्यामुळे मुंबईमध्ये अजूनही पाऊस कोसळेल का, अशी चिंता व्यक्त होत आहे.

Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times

LEAVE A REPLY

Please enter your comment!
Please enter your name here