बॉलिवूड अभिनेता सुशांतसिंह राजपूत यांच्या आत्महत्येचा तपास सुरू असतानाचा बॉलिवूडमधील ड्रग्ज कनेक्शनही समोर आलं आहे. सुशांतची मैत्रिण आणि अभिनेत्री रिया चक्रवर्तीला एनसीबीच्या पथकानं अटक केल्यानंतर बॉलिवूडमधील अनेक मोठ्या कलाकारांची नावं समोर आली आहेत. त्याचबरोबर, सातत्याने सुशांतच्या आत्महत्येबाबत प्रश्न उपस्थित करणारी अभिनेत्री कंगना राणावतदेखील ड्रग्ज घेत असल्याचे आरोप होत आहेत. यावरूनच ड्रग्ज प्रकरणी कंगनाचीही चौकशी व्हावी अशी मागणी करण्यात आहे. त्यातच आता भाजप नेते प्रवीण दरेकर यांनीही कंगनाच्या चौकशीची मागणी केली आहे.
‘ड्रग्ज प्रकरणात जो न्याय इतरांना तोच न्याय कंगानाला. ती काही या देशाची वेगळी नागरिक नाहीये. कायदा सर्वांनाचा सारखा. कुणीही कोणाला पाठीशी घालण्याची गरज नाही,’ असं प्रवीण दरेकर यांनी स्पष्ट केलं आहे.
दरम्यान, पुण्यात आयोजित पत्रकार परिषदेत प्रवीण दरेकर यांनी मराठा आरक्षण व एकनाथ खडसे यांच्या पक्षांतरांच्या मुद्द्यांवरही चर्चा केली आहे. मराठा समाजाला आर्थिक दुर्बल घटकांच्या सवलती दिल्या आहेत, त्यावर समाज समाधानी नाही. मराठा समाजाला भरघोस पॅकेज द्यायला हवे मात्र, सरकारकडून मलमपट्टी करण्याचे प्रयत्न सुरु आहेत, असा आरोप त्यांनी केला आहे. त्याचबरोबर एकनाथ खडसे पक्षांतर करणार का प्रश्वांवर त्यांनी, एकनाथ खडसे हे जेष्ठ नेते आहेत. त्यांना सन्मान देण्यासाठी केंद्रीय समिती आहे. या विषयावर मी बोलणे उचित नाही, असं त्यांनी स्पष्ट केलं आहे.
हे सरकार अंहकाराने ग्रासले आहे
पुण्यात करोना रुग्णांची संख्या वाढत आहे. यावर कोणाचेही लक्ष नाही. राज्य सरकार आमच्या सूचना लक्षात घेत नाही. सरकारने विरोधी पक्षाला सोबत घेतल्यास आत्तापर्यंत करोनावर नियंत्रण मिळवणे शक्य झाले असते. पण हे सरकार अंहकाराने ग्रासलेले आहे, असा घणाघात त्यांनी केला.
Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times
