कडकनाथ कोंबड्यांचे आमिष दाखवले, शेतकऱ्यांना १७ लाखांना फसवले

म.टा. प्रतिनिधी, नागपूरः कडकनाथ कोंबड्याचे पालन केल्यास अधिक नफा मिळवून देण्याचे आमिष दाखवून तब्बल ११० शेतकऱ्यांची १६ लाख ४९ हजार रुपयांनी फसवणूक करण्यात आली. याप्रकरणी आर्थिक गुन्हेशाखा पोलिसांनी सांगलीतील कंपनीच्या संस्थापक व संचालकाविरुद्ध गुन्हा दाखल केला आहे.

सुधीर शंकर मोहिते व संदीप सुभाष मोहिते (दोन्ही रा. ) अशी गुन्हा दाखल करण्यात आलेल्यांची नावे आहेत. शेतकरी विकास बलवंतराव मेश्राम (रा. गुमथळा, ता. कळमेश्वर) यांनी दिलेल्या तक्रारीवरून हा गुन्हा दाखल करण्यात आला. सुधीर व संदीप या दोघांनी शेतकऱ्यांना कडकनाथ कोंबड्याचे पालन करण्यास सांगून नफा मिळवून देण्याचे आमिष दाखविले. दोघांनी शेतकऱ्यांसोबत करारही केला. ११० शेतकऱ्यांकडून १६ लाख ४९ हजार रुपये जमा केले. मात्र, शेतकऱ्यांना नफा दिला नाही व मूळ रक्कमही परत केली नाही. फसवणूक झाल्याने शेतकऱ्यांनी पोलिसांत तक्रार केली. पोलिसांनी दोघांविरुद्ध गुन्हे दाखल केले. या दोघांनी आणखीही काही केल्याची माहिती आहे. फसवणूक झालेल्या शेतकऱ्यांनी सिव्हिल लाइन्समधील आर्थिक गुन्हे शाखेच्या कार्यालयात पोलिस निरीक्षक मीना जगताप यांच्याशी संपर्क साधावा, असे आवाहन पोलिसांनी केले आहे.