आज शुक्रवारी सोने आणि चांदीमध्ये चढ उतार दिसून आले. करोना संकट आणि बाजारातील मागणी कमी झाल्याने सोने आणि चांदीचे दर कमी झाले आहेत. मल्टी कमॉडिटी एक्सचेंजवर रात्री आठ वाजता सोने प्रती १० ग्रॅम ४९६३९ रुपये असून त्यात २६५ रुपयांची घसरण झाली आहे.
सध्या चांदी भाव ८५२ रुपयांनी कमी झाला असून एक किलो चांदीचा दर ५८७७७ रुपये झाला आहे. सोन्यावर ३ टक्के वस्तू आणि सेवा कर तसेच घडणावळ मजुरी आकारली जाते. त्यामुळे प्रत्यक्ष बाजारात सोन्याच्या किंमतीत ४ ते ५ हजारांची वाढ होते. बुधवारी सोने ९५० रुपयांनी आणि चांदी २७०० रुपयांनी स्वस्त झाली होती.
goodreturns या वेबसाईटनुसार शुक्रवारी मुंबईत २२ कॅरेट सोन्याचा भाव ४८३५० रुपये आहे. २४ कॅरेटसाठी तो ४९३५० रुपये आहे. दिल्लीत २२ कॅरेट सोन्याचा भाव ४८८०० रुपये आहे. तर २४ कॅरेटसाठी तो ५३१९० रुपये आहे. कोलकात्यात २२ कॅरेट सोन्याचा भाव ४८२०० रुपये आहे. तर २४ कॅरेटसाठी तो ५१९०० रुपये आहे. चेन्नईत २२ कॅरेट सोन्याचा भाव ४८०५० रुपये आहे. तर २४ कॅरेटसाठी तो ५२३७० रुपये आहे.
युरोपात करोनाची दुसरी लाट आल्याच्या भीतीने गुंतवणूकदारांची झोप उडाली आहे. यामुळे त्यांनी सोने आणि चांदीमधील गुंतवणूक काढून घेण्याचा सपाटा लावला आहे. परिणामी कमॉडिटी बाजारात या दोन्ही मौल्यवान धातूंच्या किमतींना उतरती कळा लागली आहे. गेल्या आठवड्यात शेवटच्या सत्रात शुक्रवारी ६७३८७ रुपये होता. सोन्याच्या तुलनेत चांदीमध्ये मोठ्या प्रमाणात घसरण झाली आहे. तीन सत्रात चांदीमध्ये ८००० रुपयांची घसरण झाली आहे.
Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times
