एजाज लकडावाला याच्यावर विरोधी टोळीतील गुंड हल्ला करू शकतात, अशी शक्यता आर्थर रोड तुरुंग प्रशासनानं न्यायालय आणि मुंबई पोलिसांना लिहिलेल्या पत्रात व्यक्त केली आहे. लकडावाला हा सुरुवातीला मुंबईत दाऊद टोळीसाठी काम करत होता. मात्र, त्यानंतर तो राजन टोळीत सामील झाला. छोटा राजनच्या सांगण्यावरून १९९३मधील बॉम्बस्फोट प्रकरणातील आरोपी राजीला त्यानं ठार मारलं होतं. तो राजन टोळीतूनही बाहेर पडला होता. २००१ पासून तो स्वतःच गुन्हेगारी टोळी चालवत होता.
दाऊदचा जवळचा सहकारी छोटा शकीलनं २००३मध्ये बँकॉकमध्ये लकडावाला यांच्यावर हल्ला केला होता. तो जखमीही झाला होता. या हल्ल्यातून तो बचावला होता. त्यानंतर तो नेपाळमध्ये राहत होता. तेथून तो पाटण्यात येत असे. मुंबईतील अनेक खंडणी प्रकरणांत त्याचं नाव समोर आलं होतं. त्याला पाटणातून अटक केल्यानंतर सध्या पोलीस कोठडीत आहे. सुरक्षेच्या कारणास्तव लकडावालाला तळोजा तुरुंगात हलवण्याची विनंती करतानाच, तुरुंग प्रशासनानं कैद्यांची संख्या वाढली असल्याचंही कारण पुढं केलं.
मुलीच्या चौकशीतून मिळाली होती माहिती
लकडावाला याची मुलगी सानिया हिला मुंबई पोलिसांच्या खंडणी विरोधी पथकाने ३० डिसेंबर रोजी बनावट पासपोर्टप्रकरणी अटक केली होती. ती मुंबईहून नेपाळला पळून जाण्याच्या प्रयत्नात होती. सानियाच्या चौकशीत मिळालेल्या माहितीच्या आधारे मुंबई पोलिसांच्या खंडणी विरोधी पथकाने सापळा रचून एजाज याच्या मुसक्या आवळल्या. त्याची २१ जानेवारीपर्यंत पोलीस कोठडीत रवानगी करण्यात आली आहे.
Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times
