याबाबत डॉ. चिन्मय विठ्ठल देशमुख (वय ३२, रा. राजश्री सोसायटी, बिबवेवाडी) यांनी पोलिसांत तक्रार दिली आहे. त्यानुसार दोन अनोळखी चोरट्यांच्या विरोधात गुन्हा दाखल करण्यात आला आहे. पोलिसांनी दिलेल्या माहितीनुसार, तक्रारदार व त्यांची पत्नी हे डॉक्टर आहेत. शनिवारी रात्री पती-पत्नी खेड शिवापूर येथे हॉटेलमध्ये जेवण्यासाठी गेले होते. जेवण झाल्यानंतर ते त्यांच्या कारमधून मध्यरात्री साडेबाराच्या सुमारास मुंबई-बंगळुरू महामार्गाने पुण्याकडे येत होते. कात्रज नवीन बोगद्याच्या अलीकडे मराठीबाणा हॉटेलजवळ चिन्मय हे लघुशंकेसाठी थांबले. त्यावेळी आचानक दुचाकीवरून दोघे जण त्या ठिकाणी आले. कारजवळ चिन्मय यांची पत्नी थांबली होती. चोरट्यांनी डॉक्टरांकडे पिस्तुल रोखला. त्यांच्याकडे सुरूवातीला पैशांची मागणी केली. त्यांच्याकडे पैसे मिळाले नाहीत. त्यामुळे त्यांनी डॉक्टर चिन्मय आणि त्यांच्या पत्नीकडील दोन सोन्याच्या अंगठ्या, त्यांचे महागडे घड्याळ असा एक लाख २० हजार रूपयांचा मुद्देमाल जबरदस्तीने काढून घेतला. त्यानंतर चोरटे साताऱ्याच्या बाजूने दुचाकीवरून निघून गेले. या प्रकारामुळे डॉक्टर दाम्पत्य घाबरले होते. त्यांनी तत्काळ पोलीस नियंत्रण कक्षाला फोन करून घटनेची माहिती दिली. माहिती मिळताच भारती विद्यापीठ पोलिसांनी घटनास्थळी धाव घेतली. त्यानंतर डॉक्टरांच्या तक्रारीवरून गुन्हा दाखल केला आहे. चोरट्यांचा शोध घेत आहेत. या घटनेचा अधिक तपास पोलीस उपनिरीक्षक महेंद्र पाटील करत आहेत.
Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times
