भयंकर! करोना रुग्णांच्या मोबाइलवरीलडेटा होतोय 'लीक'

महापालिकेच्या किंवा खासगी प्रयोगशाळेत करोना चाचणी करणाऱ्या व्यक्तींच्या, तसेच रुग्णालयातून उपचार घेऊन झालेल्या व्यक्तींच्या मोबाइलवर ‘अँटिबॉडी’सह अन्य चाचण्यांसाठीच्या ‘एसएमएस’चा मारा सुरू झाला आहे. त्यामुळे करोना संशयित व करोनामुक्त व्यक्तींच्या मोबाइल क्रमांकाचा ” होऊन, त्याचा वापर व्यावसायिक कारणांसाठी होत असल्याचा संशय व्यक्त केला जात आहे.

पुणे महापालिकेची विविध चाचणी केंद्रे, खासगी प्रयोगशाळा व रुग्णालये, तसेच रॅपिड अँटिजेन टेस्टद्वारे आतापर्यंत सहा लाखांहून अधिक करोना चाचण्या करण्यात आल्या. या वेळी संबंधित व्यक्तींचे मोबाइल क्रमांक नोंदवून घेतले जातात. मात्र, या मोबाइल क्रमांकाचा वापर व्यावसायिक कारणांसाठी होत आहे. कारण अनेक व्यक्तींच्या मोबाइलवर खासगी प्रयोगशाळांकडून ‘अँटिबॉडी चाचणी’ किंवा अन्य चाचण्यांचे मेसेज येत आहेत. विविध सरकारी व खासगी रुग्णालयांतून उपचार घेऊन बरे झालेल्या रुग्णांच्या मोबाइलवरही मेसेजचा मारा सुरू आहे. त्यामुळे करोना संशयित व करोनामुक्त व्यक्तींच्या मोबाइल क्रमांकाचा ‘डेटा’ व्यावसायिक कारणांसाठी वापरण्यात येत असल्याचे आढळत आहे.

सर्वच यंत्रणांकडे माहिती उपलब्ध

करोना चाचणी करणाऱ्या व्यक्तींची माहिती महापालिका स्तरावर संकलित होत असली, तरी ही माहिती सर्व क्षेत्रीय कार्यालये, जिल्हा आरोग्य विभाग, जिल्हाधिकारी कार्यालय, विभागीय आयुक्त कार्यालय, स्मार्ट सिटी, तसेच राज्याच्या व केंद्राच्या आरोग्य विभागापर्यंत पाठवली जाते. त्यामुळे डेटा लीक होण्याचा प्रश्नच येत नाही, असे महापालिकेच्या आरोग्य विभागाने स्पष्ट केले.

सरकारी व खासगी प्रयोगशाळांमध्ये चाचणी केलेल्या, तसेच करोनावर मात करून बरे झालेल्या व्यक्तींना विविध चाचण्यांचे मेसेज येत आहेत. त्यामुळे महापालिकेच्या चाचणी केंद्रातून किंवा खासगी प्रयोगशाळा, रुग्णालयांतून रुग्णांची यादी कोणालाही दिली जाऊ नये, अशा सूचना महापालिका आयुक्तांनी संबंधित यंत्रणेला द्याव्यात.

– संदीप खर्डेकर, अध्यक्ष, क्रिएटिव्ह फाउंडेशन

महापालिकेच्या प्रयोगशाळांमध्ये चाचणी करणाऱ्यांचा, रुग्णालयात उपचार घेणाऱ्यांचा डेटा केवळ सरकारी यंत्रणांना पाठविला जातो. अन्य कोणालाही तो दिला जात नाही. मात्र, तरीही या प्रकाराची माहिती घेतली जाईल.

– डॉ. संजीव वावरे, सहायक आरोग्य प्रमुख, पुणे महापालिका