दिल्लीच्या संघाने नाणेफेक जिंकली आणि हैदराबादच्या संघाला प्रथम फलंदाजी करण्यासाठी पाचारण केले. हैदराबादच्या डेव्हिड वॉर्नर आणि जॉनी बेअरस्टो यांनी यावेळी संघाला सावध सुरुवात करून दिली. पण स्थिरस्थावर झाल्यावर या दोघांनी चांगली फटकेबाजी करायला सुरुवात केली. वॉर्नर आणि बेअरस्टो यांनी संघाला ७७ धावांची सलामी करून दिली.
वॉर्नर यावेळी या आयपीएलमधील पहिले शतक झळकावेल, असे वाटत होते. पण दिल्लीचा फिरकीपटू अमित मिश्राने यावेळी वॉर्नरला बाद करत हैदराबादला पहिला धक्का दिला. वॉर्नरने यावेळी ३३ चेंडूंत ४५ धावांची खेळी साकारली. वॉर्नर बाद झाल्यावर काही वेळातच मनीष पांडेच्या रुपात हैदराबादला दुसरा धक्का बसला, पांडेला फक्त तीन धावाच करता आल्या. मिश्रानेच यावेळी हैदराबादला दुसरा धक्का दिल्याचे पाहायला मिळाले.
पांडे बाद झाल्यावर आयपीएलच्या या हंगामात पहिल्यांदाच मैदानात उतरला तो केन विल्यमसन. पहिल्यांदाच मैदानात उतरलेल्या विल्यमसनने यावेळी दमदार फलंदाजीचा नमुना पेश केला. आतापर्यंत विल्यमसन कुठे होता, असा प्रश्न यावेळी चाहत्यांना पडला होता. कारण विल्यमसनने यावेळी चांगली फटकेबाजी करत चाहत्यांची मने जिंकली. त्याचबरोबर जॉनी बेअरस्टोने यावेळी अर्धशतकही झळकावले. पण अर्धशतक झळकावल्यावर जॉनीला जास्त धावा करता आल्या नाहीत. यावेळी जॉनी ५३ धावांवर बाद झाला.
जॉनी बाद झाल्यावर विल्यमस संघाची जबाबदारी आपल्या खांद्यावर घेतली आणि जोरदार फटकेबाजी सुरु केली. विल्यमसनने यावेळी २६ चेंडूंत ४१ धावांची खेळी साकारली. हैदराबादचा युवा फलंदाज अब्दुल समदनेही यावेळी अखेरच्या षटकांमध्ये दमदार फटकेबाजी केली.
दिल्ली कॅपिटल्सकडून फिरकीपटू अमित मिश्रा हा यशस्वी गोलंदाज ठरला. कारण मिश्राने सलामीवीर डेव्हिड वॉर्नरबरोबरच मनीष पांडेलाही बाद करत हैदराबादला दुहेरी धक्का दिला.
Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times
