म.टा. प्रतिनिधी, नगरः पारनेर नगरपंचायतीच्या शिवसेनेच्या नगरसेवकांचा राष्ट्रवादीतील प्रवेश आणि घरवापसीची घटना ताजी असताना आता कर्जत आणि जामखेड नगर पालिकेतील भाजपच्या नगरसेवकांनी राष्ट्रवादीची वाट धरली आहे. तेथील आमदार रोहित पवार यांच्यावर विश्वास व्यक्त करीत कर्जतमधील दोन नगरसेवकांसह भाजपच्या काही कार्यकर्त्यांनी पवार यांच्या वाढदिवशीच राष्ट्रवादीत प्रवेश केला. तर जामखेडमधील भाजपचे तीन नगरसेवक आणि काही कार्यकर्ते लवकरच राष्ट्रवादीत प्रवेश करणार आहेत.

मागील चार वर्षांपासून जामखेड नगरपरिषदेमध्ये भाजपचे सहयोगी सदस्य असलेल्या तीन नगरसेवकांनी राष्ट्रवादी काँग्रेसच्या प्रमुख नेत्यांच्या उपस्थितीत राष्ट्रवादी काँग्रेसमध्ये प्रवेश करण्याचा निर्णय पत्रकार परिषदेत जाहीर केला आहे. जामखेड नगरपरिषदेचे उपनगराध्यक्ष व विद्यमान नगरसेवक महेश निमोणकर, मोहन पवार, राजेश वाव्हळ या तिनही नगरसेवकांनी राष्ट्रवादी काँग्रेसमध्ये प्रवेश करण्याचा निर्णय पत्रकार परिषदेत जाहीर केला. राष्ट्रवादीचे ज्येष्ठ कार्यकर्ते प्रा. मधुकर राळेभात, माजी सभापती सुभाष आव्हाड, ज्येष्ठ नेते सुर्यकांत मोरे, तालुका उपाध्यक्ष दयानंद कथले, सतिष चव्हाण यावेळी उपस्थित होते.

राष्ट्रवादीतील प्रवेशासंबंधी भूमिका मांडताना नगरसेवक निमोणकर म्हणाले, ‘मी अपक्ष निवडून येऊन भाजपला बिनशर्थ पाठींबा दिला होता. वर्षापूर्वी झालेल्या विधानसभा निवडणुकीत आपण माजी मंत्री राम शिंदे यांचे काम केले होते. तरीही भाजपवाले मला त्यांचा समजत नव्हते. तसेच शहराचा खुंटलेला विकास व आमदार रोहीत पवार यांनी औद्योगिक वसाहत व शहराचा करमाळा तालुक्यातील दहिगाव येथून होणारी पाणीपुरवठा योजना मार्गी लावण्यासाठी उचलले पाऊल पाहून आम्ही प्रभावीत झालो.’ या तीन नगरसेवकांनी टाकलेल्या विश्वासाचे पक्ष स्वागत करीत आहे. लवकरच पवार यांच्या उपस्थितीत त्यांचा प्रवेश होईल, असे राळेभात यांनी सांगितले.

कर्जतमध्ये तर रोहित पवार यांच्या वाढदिवसाच्या दिवशीच भाजपच्या कार्यकर्त्यांनी राष्ट्रवादीत प्रवेश करून त्यांना वाढदिवसाची भेट दिली. भाजपचे माजी उपनगराध्यक्ष व विद्यमान नगरसेवक बापूसाहेब नेटके, नगरसेविका मनीषा सोनमाळी आणि त्यांचे पती सचिन सोनमाळी तालुका उपाध्यक्ष सतीश पाटील आणि डॉ प्रकाश भंडारी यांनी राष्ट्रवादीत प्रवेश केला. तालुकाध्यक्ष काकासाहेब तापकीर व राष्ट्रवादी युवकचे अध्यक्ष नितीन धांडे आणि सुनील शेलार यांनी त्यांचे स्वागत केले.

आमदार पवार यांच्या वाढदिवसाच्या दिवशी त्यांना आगळवेगळी भेट आणि भाजपला धक्का देण्याची तयारी राष्ट्रवादीच्या एका युवक नेत्याने केली होती. त्या नसार त्यांनी भाजपचे माजी उपनगरध्यक्षासह दोन नगरसेवक तालुका उपाध्यक्ष, महिला आघाडीच्या जिल्हा उपाध्यक्ष यांना पक्षात घेत भाजपचे माजी मंत्री राम शिंदे, खासदार डॉ. सुजय विखे पाटील आणि अन्य नेत्यांना धक्का दिल्याचे सांगण्यात येते.

यावेळी बोलताना सतीष पाटील म्हणाले, ‘ हा जातीयवादी पक्ष आहे त्या पक्षात मी पूर्वी गेलो हीच चूक झाली. आज ती चूक दुरुस्त करीत आहे. आमदार पवार हे राज्यात काम करीत आहेत. अशा युवक नेत्यांच्या सोबत काम करण्यास आंनद वाटतो. यामुळे भाजपला राम राम ठोकला.’

Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times

LEAVE A REPLY

Please enter your comment!
Please enter your name here