अहमदनगर: नगर महापालिकेच्या स्वीकृत नगरसेवक पदावरून उफाळून आलेला नगरच्या शिवसेनेतील अंतर्गत वाद शमण्याची चिन्हे दिसत नाहीत. आता नगरसेवक गणेश कवडे यांनी शिवसेनेचे शहरप्रमुख यांच्याकडून सेनेच्या नगरसेवकांवर अन्याय होत असल्याचा आरोप केला आहे. तसेच नगरसेवक व पदाधिकारी मुख्यमंत्री उद्धव ठाकरे यांची लवकरच भेट घेऊन शहरप्रमुख बदलीची मागणी करणार आहे, असेही कवडे यांनी स्पष्ट केलेयं.

महापालिकेच्या स्वीकृत नगरसेवकांची निवडीवरून शिवसेनेतील अंतर्गत वाद समोर येऊ लागलाय. शिवसेनेचे सावेडी विभाग प्रमुख चंद्रकांत उर्फ शेळके यांनी तर थेट मुख्यमंत्री उद्धव ठाकरे यांना पत्र पाठवून नगरच्या शिवसेनेत जातीच राजकारण केले जात असल्याचा आरोप केला होता. आता काल स्वीकृत नगरसेवकांची निवडही झाली आहे. मात्र, त्यानंतरही शिवसेनेतील अंतर्गत वाद शमण्याची चिन्हे दिसत नाहीत. कारण आता नगरसेवक गणेश कवडे यांनी शेळके यांना प्रत्युत्तर देतानाच शहरप्रमुखांवर सुद्धा टीका केली आहे. कवडे यांनी म्हटले की, दुसर्‍या पक्षातून शिवसेनेत आलेले काका शेळके व पक्षातील काही पदाधिकार्‍यांनी ‘फुटीरवादी’ कोण आहे, याचे स्वतःच आत्मपरीक्षण करावे. सावेडी विभागप्रमुख झाल्यापासून सावेडी विभागात संघटनेसाठी केलेल्या कामाचा त्यांनी खुलासा करावा. सावेडी विभागाची परिस्थिती पाहता तेथे शाखाप्रमुख व कुठलीही कार्यकारणी अद्याप नेमणूक केली नाही. या बाबतीत शेळके इतके गाफील कसे ? फक्त जातीवाद करून पक्षात व समाजात तेढ निर्माण करायचे एवढेच कामे करण्यात पुढाकार ते घेतात का? त्यापेक्षा पक्ष हितासाठी कार्य करुन पक्ष बळकट कसा होईल याकडे त्यांनी लक्ष द्यावे. संपर्कप्रमुख व शहरातील नगरसेवक हे वरिष्ठांचे आदेश पाळणारे एक सच्चे शिवसैनिक आहे. आजवर संघटना वाढीसाठी वेळोवेळी आम्ही एकजुटीने प्रयत्न केले आहे. परंतु शिवसेना शहरप्रमुख व त्यांच्या गटातील काही नगरसेवक पदाधिकारी हे त्यांची मनमानी पक्षात चालवण्याचा प्रयत्न करतात. हे लोक त्यांचे निर्णय अंतिम मानतात, त्यात ते स्थानिक पातळीवर पक्षातील इतर नगरसेवक व कार्यकर्ते यांचे मत विचारात घेत नाही. मंत्री शंकरराव गडाख यांच्या समवेत झालेल्या बैठकीनंतर सुद्धा त्यांनी एकजुटीची भूमिका घेतली नाही. यावरूनच दिसून येते की पक्षश्रेष्ठींचे मत व निर्णय हे पालन करण्याची त्यांची भूमिका नाही, असेही कवडे यांनी स्पष्ट केले.

गेल्या अनेक दिवसांपासून जिल्हाप्रमुख व शहरप्रमुख यांच्याकडे सदस्य नोंदणी फॉर्मची मागणी केली असता ते उपलब्ध करून दिले नाही. अशा अनेक समस्या शहरात असताना याकडे हे जाणीवपूर्वक दुर्लक्ष करून जातीपातीचे राजकारण दुसऱ्यांच्या खांद्यावर बंदूक ठेवून करतात. यांच्या या वागणुकीमुळे आम्ही नगरसेवक व पदाधिकारी मुख्यमंत्री उद्धव ठाकरे यांची लवकरच भेट घेऊन शहरप्रमुख बदलीची मागणी करणार आहे, असेही कवडे यांनी स्पष्ट केलेयं. दरम्यान, नगरसेवक कवडे यांच्या या प्रत्युत्तरानंतर शिवसेनेतील अंतर्गत वाद वाढणार का, किंवा वेळीच वरिष्ठ नेते यामध्ये लक्ष घालत तो मिटवणार, याकडे राजकीय वर्तुळाचे लक्ष लागले आहे.

Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times

LEAVE A REPLY

Please enter your comment!
Please enter your name here