वाघाच्या जबड्यात घालुनि हात… सांगलीतला हा पठ्ठ्या दोन बिबट्याशी झुंजला

सांगली: मांगले येथील बांबर डोंगर परिसरात असलेल्या शेवडे वस्तीजवळ उसाच्या शेतात दबा धरून बसलेल्या दोन बिबट्यांनी तरुणावर हल्ला केला. तरुणाने मोठ्या धैर्याने बिबट्यांशी झुंज देत हल्ला परतवून लावला. सुदैवाने वेळीच लोकांनी आरडाओरडा करीत मदतीसाठी धाव घेतल्याने बिबट्यांनी धूम ठोकली. या घटनेत जखमी झालेला तरुण आदिनाथ विलास शेवडे ( वय २५, रा. शेवडे वस्ती, मांगले, ता. ) याला उपचारासाठी मांगले येथील प्राथमिक आरोग्य केंद्रात दाखल करण्यात आल आहेे. गुरुवारी (ता. १) रात्री साडेसातच्या सुमारास ही घटना घडल्यानंतर परिसरात बिबट्यांची दहशत वाढली आहे.

घटनास्थळावरून मिळालेल्या माहितीनुसार, आदिनाथ शेवडे याचे घर मांगले येथील शेवडे वस्तीवर आहे. घरापासून जवळच जनावरांचे शेड आहे. गुरुवारी रात्री आदिनाथ दूध घालण्यासाठी गावातील डेअरीत गेला होता. साडेसातच्या सुमारास परत आल्यानंतर त्याला घराच्या मागे उसातून कुत्रे भुंकत असल्याचा आवाज आला. घरात जाण्यापूर्वीच तो आवाजाच्या दिशेने निघला. घराच्या पाठीमागे जाताच उसात दबा धरून बसलेल्या दोन बिबट्यांपैकी एक बिबट्या आदिनाथच्या अंगावर धावून आला. त्यावेळी आदिनाथने हातातील दुधाची रिकामी किटली बिबट्याला तोंडावर मारत त्याला हुसकवण्याचा प्रयत्न केला. याचवेळी समोरून दुसऱ्या बिबट्याने आदिनाथच्या अंगावर झेप घेतली. स्वत:चा बचाव करताना आदिनाथ पाय घसरून खाली पडला. यामुळे बिबट्याच्या नख्यांचे ओरखडे त्याच्या छातीवर उटले. दुसऱ्या बिबट्याने त्याचा शर्ट तोंडात पकडून खेचण्याचा प्रयत्न केला. जमिनीवर पडलेल्या स्थितीत त्याने रिकाम्या किटलीने दोन्ही बिबट्यांना हुसकावण्याचे प्रयत्न सुरू ठेवले. याचवेळी आरडाओरडा केल्याने वस्तीवरील लोकांनी उसाकडे धाव घेतली. लोकांनी आरडाओरडा केल्याने दोन्ही बिबट्यांनी उसातून पळ काढला.

अचानक घडलेल्या घटनेने मानसिक धक्का बसलेला आदिनाथ बेशुद्ध पडला. नातेवाइकांनी तातडीने त्याला उपचारासाठी मांगले येथील प्राथमिक आरोग्य केंद्रात दाखल केले. काही वेळानंतर तो शुद्धीवर आला. वैद्यकीय अधिकारी डॉ. नरेंद्र घड्याळे यांनी त्याच्यावर उपचार केले. बिबट्याच्या हल्ल्यात त्याच्या छातीवर जखम झाली असून, डावा हात मोडला आहे, अशी माहिती डॉक्टरांनी दिली. मांगले परिसरात गेल्या महिनाभरात बिबट्यांकडून हल्ल्याच्या तीन घटना घडल्या आहेत. पूर्ण वाढ झालेल्या दोन बिबट्यांसह त्याच्या दोन बछड्यांचा वावर या परिसरात आहे. मानवी वस्तीत येणाऱ्या बिबट्यांना जेरबंद करून जंगलात सोडावे, अशी मागणी या परिसरातील लोकांनी वन विभागाकडे केली आहे.

गुरुवारी सकाळी एक बिबट्या जेरबंद

मांगले परिसरात वावरणाऱ्या बिबट्यांपैकी एक बिबट्या गुरुवारी सकाळी वनविभागाने लावलेल्या सापळ्यात जेरबंद झाला आहे. हा बिबट्या जेरबंद झाल्यानंतर आणखी दोन बिबटे बांबर डोंगरातून खाली गावाच्या दिशेने येत असल्याचे काही शेतकऱ्यांनी पाहिले होते. बिबट्यांकडून तरुणावर हल्ला झाल्यानंतर या परिसरात दहशत वाढली आहे. वस्तींवरील जनावरांना धोका वाढला असून, रात्रीच्या अंधारात घराबाहेर पडण्याची भीती वाटत असल्याचे या परिसरातील लोक सांगतात.