सर्वाधिक विक्री होणारे औषध
मुंबईमध्ये स्थानिक पोलिस ठाणी; तसेच अंमली पदार्थविरोधी पथकांनी असे पदार्थ पुरविणाऱ्यांविरोधात कंबर कसल्याने ते सहज मिळणे कठीण झाले आहे. यामुळे नशेबाजांनी प्रतिबंधित औषधांचा डोस घेण्याकडे आपला मोर्चा वळविला आहे. केमिस्टमध्ये हे प्रिस्क्रिप्शनशिवाय सर्वाधिक विक्री होणारे औषध आहे. नशेसाठी कफ सीरपची विक्री करणाऱ्यांवर पोलिस आणि एफडीएकडून कारवाई करण्यात येते. मात्र, विश्वसनीय सूत्रांनी दिलेल्या माहितीनुसार एफडीएने सन २०१९मध्ये अशा केवळ दोन-तीन कारवाया केल्या असून, त्यांमध्ये जप्त करण्यात आलेला साठाही नगण्य आहे. ही नेमकी कारवाई किती याबाबत एफडीएच्या अधिकाऱ्यांशी संपर्क साधला असता माहिती मिळू शकली नाही. मुंबई पोलिसांच्या अंमली पदार्थविरोधी पथकाने मात्र सन २०१९मध्ये सात हजार कफ सीरपच्या बाटल्या हस्तगत केल्या असून, ११ जणांना अटक करण्यात आली आहे.
ऑपरेशन कमळी
सन २०२०च्या सुरुवातीला ‘ऑपरेशन कमळी’ हाती घेतल्याने ड्रग्ज सहजासहजी मिळणे मुश्कील झाल्याने कफ सीरपचा वापर वाढला. मुंबईत नशेसाठी कफ सीरप पुरविणाऱ्या अमृतलाल उर्फ अमित राठोड या बड्या विक्रेत्याला अंमली पदार्थविरोधी पथकाचे पोलिस निरीक्षक प्रवीण कदम यांच्या पथकाने अटक केली. त्याच्याकडे तब्बल साडेसहा लाखांच्या १६३८ कफ सीरपच्या बाटल्या सापडल्या.
उत्तेजित आणि धुंदी
कफ सीरप हे औषध म्हणून घेतल्यास त्याचे प्रमाण ठरावीक असते; पण नशेसाठी दोनशे मिलीची बाटली तरुण पितात. हे सीरप तत्काळ परिणाम दाखवते. ड्रग्जप्रमाणे उत्तेजित करते आणि नंतर शरीर सुस्त करते. सीरप अधिक प्रमाणात घेतल्यास ही धुंदी झोप आणते. त्यामुळे आपल्या घरातील तरुण-तरुणी वारंवार कफ सीरप घेत असल्यास वेळीच सावध व्हा, असे आवाहन पोलिसांच्या वतीने करण्यात आले आहे.
कफ सीरपच का?
-कफ सीरप केमिस्टमध्ये सहज मिळते.
-अनेक केमिस्ट प्रिस्क्रिप्शन विचारत नाहीत.
-ओळखीच्या केमिस्टकडून तर अजिबात विचारणा होत नाही.
-खोट्या प्रिस्क्रिप्शनची शहानिशा केली जात नाही.
-पोलिसांच्या तावडीत सापडण्याची शक्यता कमी.
-सर्दी, खोकल्याचे कारण दिल्याने घरच्यांनाही संशय येत नाही.
-दारू किंवा ड्रग्जप्रमाणे दुर्गंधी येत नाही.
Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times
