ड्रग्जविरोधात मुंबई पोलिसांचीही मोहीम; इथेही बॉलिवूड कनेक्शन

नॉर्कोटिक्स कंट्रोल ब्युरोने (एनसीबी) बॉलिवूडमधील अंमली पदार्थ तस्करीविरोधात चौकशीचा फास आवळला असतानाच आता मुंबई गुन्हे शाखेनेही तीव्र केली आहे. आठवड्याभरात पोलिसांनी ठिकठिकाणी कारवाई करीत एमडी, कोकेन तसेच पार्टी ड्रग्जसह अनेकांची धरपकड केली आहे. विशेष म्हणजे वेगवगेळ्या कारवाईमध्ये अटक केलेल्या काहींचा बॉलिवूडशी कुठे ना कुठे संबंध येत असल्याचे समोर आले आहे. एनसीबीच्या झाडाझडतीनंतर आता पोलिसही कामाला लागले आहेत.

गुन्हे शाखा युनिट ११ चे प्रभारी पोलिस निरीक्षक सुनील माने यांच्या पथकाने बोरिवली पूर्वेकडील दत्तपाडा येथून निकेतन ऊर्फ निखिल जाधव आणि परवेझ हनीफ हलाई या दोघांना ताब्यात घेतले. अंगझडतीमध्ये या दोघांकडे सुमारे साडेतीन लाखांचे एमडी ड्रग्ज सापडले. चौकशीमध्ये यातील एका आरोपीविरोधात घरफोडी, बनावट दस्तावेज करून फसविणे, हत्येचा प्रयत्न यांसारखे सात गुन्हे वेगवेगळ्या पोलिस ठाण्यांत दाखल असल्याचे समोर आले. या गुन्ह्यांतून जामिनावर बाहेर आल्यानंतर त्याने बॉलिवूडमध्ये प्रवेश केला. अनेक चित्रपट निर्मिती कंपन्या, आंतरराष्ट्रीय रिअॅलिटी शो तसेच नामवंत कलाकारांकडे त्याने मेकअपमन म्हणून काम केले आहे. दुसऱ्या एका कारवाईमध्ये गुन्हे शाखा युनिट ७ चे पोलिस निरीक्षक मनीष श्रीधनकर यांच्या पथकाने गोवंडी परिसरातून एका महिलेला अटक केली. या महिलेकडे तब्बल दहा लाखांचे कोकेन सापडले. महिलेने हे अंमली पदार्थ विक्रीसाठी आणले होते. मात्र तिने ते कुठून आणले आणि खरेदी करण्यासाठी तिच्या संपर्कात असलेल्यांची माहिती काढली जात असल्याचे पोलिसांनी म्हटले आहे.

आणखी काही कारवाई

– गुन्हे शाखेच्या मालमत्ता कक्षाच्या पथकाने डोंगरी परिसरातून दोघांना अटक केली. उच्चभ्रू पार्ट्यांमध्ये वापरण्यात येणाऱ्या आणि प्रतिबंधित असलेल्या ५० लाखांच्या एक्सटॅसी गोळ्या हस्तगत करण्यात आल्या.

– पाचशे गाणी आणि कथा लिहून मुंबईत नशीब आजमावण्यासाठी आलेला तरुण बॉलिवूडमध्ये अपयशी ठरला. उपजीविकेसाठी अंमली पदार्थांची विक्री करणाऱ्या या तरुणाला अंमली पदार्थविरोधी पथकाने दहा लाखांच्या एमडी ड्रग्जसह अटक केली.

– गुन्हे शाखा युनिट ९ च्या पथकाने जोगेश्वरी परिसरातून एकाला अटक केली. त्याच्याकडे साडेपाच लाखांचे एमडी ड्रग्ज सापडले.