दारू आणण्यासाठी मित्रानं दुचाकी दिली नाही; पुढं जे घडलं ते…

जळगाव: सोबत बसून दारू पित असताना आणखी दारू आणण्यासाठी दुचाकी न देणाऱ्या मित्राच्या डोक्यात फरशीने वार करून खून केल्याची खळबळजनक घटना काल सोमवारी रात्री घडली. खून केल्यानतंर लपून बसलेल्या संशयिताच्या पोलिसांनी अवघ्या काही तासातच मुसक्या आवळल्यात. अरुण हरी पवार (वय ४५, रा. के.सी.पार्क, कानळदा रोड) असे मृताचे नाव आहे. तर मारेकरी सचिन उर्फ काल्या मंगल अटवाल हा इंद्रप्रस्थनगरातील रहीवासी आहे.

मयत अरुण पवार हे दुचाकीवरून घरोघरी जाऊन साडी विक्रीचा व्यवसाय करीत होते. सोमवारी सायंकाळी नवल मधुकर सपकाळे (रा. के.एच.पार्क) हा पवार यांच्या घरी आला. त्याच्यासोबत पवार दुचाकीने बाहेर गेले. यांनतर नवल, पवार व अटवाल हे तिघे शिवाजीनगर भागातील निर्जन ठीकाणी दारू पित होते. त्यांच्याजवळील दारू संपल्यामुळे अटवाल याने दारू आणण्यासाठी पवार यांची दुचाकी मागितली. पवार यांनी दुचाकी देण्यास नकार दिला. या गोष्टीचा राग आल्याने सचिन याने त्यांच्यासोबत वाद घालण्यास सुरुवात केली. दोघेही दारूच्या नशेत असल्याने दोघांमध्ये शाब्दिक वाद वाढून हाणामारी झाली. त्यावेळी इतर मित्रांनी वाद सोडवण्याचा प्रयत्न केला. पण ते ऐकून घेण्याच्या मनस्थितीत नव्हते. हाणामारीत सचिनने अरुण यांच्या डोक्यात फरशी घातली. त्यामुळे गंभीर दुखापत होऊन अरुण रक्ताच्या थारोळ्यात कोसळले. यामुळे सर्व घाबरून गेले. यानंतर नवल व अटवाल यांनी जखमी पवार यांना गेंदालाल मिल परिसरातील एका रुग्णालयात नेले. तेथे उपचार न झाल्यामुळे पुन्हा घटनास्थळी आणून जमिनीवर टाकून दिले.

वाचा:

यावेळी पवार बेशुद्ध झाले होते. रात्री ९.४५ वाजता मंगेश मधुकर जोहरे, अभिराज उर्फ गौरव विश्वासराव चव्हाण यांनी पवार यांच्या घरी जाऊन या घटनेची माहिती त्यांच्या पत्नीस दिली. यांनतर त्यांच्या पत्नी, जोहरे, चव्हाण व नवल हे सर्वजण घटनास्थळी आले. नवल याने घडलेला सर्व प्रकार पवार यांच्या पत्नीस सांगीतला. या सर्वांनी रिक्षेतून पवार यांना शहरातील दोन रुग्णालयात उपचारासाठी नेले. तेथे उपचार न होऊ शकल्यामुळे अखेर देवकर महाविद्यालयातील सिव्हिल हॉस्पिटलमध्ये दाखल केले. वैद्यकीय अधिकाऱ्यांनी तपासणी करून त्यांना मृत घोषित केले. यानंतर मृतदेह शासकीय वैद्यकीय महाविद्यालय व रुग्णालयात पाठवला. शवविच्छेदन करून मंगळवारी दुपारी पवार यांचा मृतदेह कुटुंबीयांच्या ताब्यात देण्यात आला. पवार यांच्या पश्चात पत्नी, आई व दोन मुले असा परिवार आहे. या प्रकरणी पवार यांच्या पत्नी रत्नाबाई यांनी दिलेल्या फिर्यादीवरून शहर पोलिस ठाण्यात अटवाल याच्या विरुद्ध खुनाचा गुन्हा दाखल करण्यात आला आहे. पोलिस निरीक्षक अरुण निकम तपास करीत आहेत.

लपून बसलेल्या संशयितास मध्यरात्री अटक

पवार बेशुद्ध झाल्यानंतर मद्यधुंद अवस्थेत असलेला अटवाल हा शुद्धीवर आला. आपल्या हातून गुन्हा झाल्याचे लक्षात येताच त्याने घटनास्थळावरुन पळ काढला होता. इंद्रप्रस्थनगरात राहणाऱ्या बहिणीच्या घरी लपून बसला होता. तर दुसरीकडे या घटनेची माहिती मिळताच शहर पोलिस ठाण्याचे कर्मचारी त्याचा शोध घेत होते. मध्यरात्री अटवाल याला पोलिसांनी अटक केली.

वाचा: