फॉर्च्युनर फेसलिफ्टमध्ये नवीन आकाराचं फ्रंट बंपर आणि ग्रिल आहे, जे कंपनीच्या लेटेस्ट जनरेशन RAV4 एसयूव्हीपासून प्रेरित आहे. ग्रिलमध्ये RAV4 प्रमाणेच इंसर्ट्सही देण्यात आले आहेत. फ्रंट बंपरमध्ये फॉर्च्युनर टीआरडी स्पोर्टीव्होप्रमाणेच फॉग लॅम्प इंसर्ट्स मिळण्याची अपेक्षा आहे.
अपडेटेड फॉर्च्युनरच्या हेडलॅम्प आणि टेललॅम्पच्या इंसर्ट्समध्ये बदल होणार आहेत, पण लाइट्सचा आकार सध्याच्या मॉडलप्रमाणेच असेल. याशिवाय नवीन फॉर्च्युनरच्या आकारातही बदल पाहायला मिळू शकतो. नव्या डिझाईनमध्ये नवीन अलॉय व्हील्स अपेक्षित आहेत. दरम्यान, फॉर्च्युनरच्या इंटिरियरचे फोटो अजून समोर आलेले नाहीत. सध्याच्या मॉडलपेक्षा अपडेटेड फॉर्च्युनरमध्ये दमदार इन्फोटेनमेंट सिस्टमसह आणखी काही आकर्षक फीचर्स मिळण्याची शक्यता आहे.
फॉर्च्युनर जगभरात विविध पेट्रोल आणि डिझेल इंजिन व्हेरिएंटमध्ये विकली जाते. यात २.७ लिटर आणि ४.० लिटर पेट्रोल इंजिन, २.४ लिटर, २.८ लिटर आणि ३.० लिटर डिझेल इंजिनचा समावेश होतो. भारतीय बाजारात अपडेटेड फॉर्च्युनरमध्ये सध्याच्या मॉडलमधील २.७ लिटर पेट्रोल आणि २.८ लिटर डिझेल इंजिन मिळेल, जे बीएस ६ उत्सर्जन मानकांची पूर्तता करणारं असेल.
अपडेटेड फॉर्च्युनर भारतीय बाजारात या वर्षाच्या अखेरपर्यंत लाँच केली जाऊ शकते. बाजारात या कारची टक्कर फॉर्ड एंडेवर, इसूजू MU-X आणि एमजी मोटर्सची आगामी मॅक्सस डी-९० सोबत होणार आहे. फॉर्च्युनर फेसलिफ्टचं हे मॉडल थायलंडमध्ये आढळून आलं. याच ठिकाणाहून पहिला फोटोही समोर आलाय.
Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times
