मुख्यमंत्री उद्धव ठाकरे यांनी नुकतीच राज्यातील मल्टिप्लेक्स व थिएटर मालकांशी व्हिडिओ कॉन्फरन्सिंगद्वारे चर्चा केली. त्यावेळी त्यांनी बॉलिवूडच्या विरोधातील कारस्थानाचा उल्लेख केला होता. ‘मागील काही दिवसांपासून ठराविक लोकांकडून बॉलिवूडला बदनाम करण्यात येत आहे, ही बाब अत्यंत वेदनादायक आहे. बॉलिवूडला संपवण्याचे किंवा इतरत्र हलवण्याचे जे प्रकार होऊ पाहत आहेत, ते कधीही सहन केले जाणार नाहीत’, असा इशारा त्यांनी दिला होता. मनसेचे खोपकर यांनीही मुख्यमंत्र्यांच्या सुरात सूर मिसळला आहे.
वाचा:
मुंबईच्या बाहेर हलविण्याच्या प्रयत्नांविषयी खोपकर यांनी आपल्या ट्वीटमध्ये भाष्य केलं आहे. सुशांतसिंह राजपूत आत्महत्या व बॉलिवूड ड्रग्ज प्रकरणाच्या अनुषंगानं त्यांनी आपलं मत मांडलं आहे. आपल्या ट्वीटमध्ये ते म्हणतात, ‘भूतकाळातही बॉलिवूडमधील कलाकारांना गंभीर गुन्ह्याखाली अटक झाली, त्यांना शिक्षा झाल्या, पण म्हणून कुणीही संपूर्ण बॉलिवूडला खलनायक ठरवलं नाही. आता मात्र जाणीवपूर्वक बॉलिवूडला बदनाम करण्याचा डाव रचला जातोय, एवढंच नाही तर फिल्मसिटीच मुंबईबाहेर हलवायचं कुटील कारस्थान रचलं जातंय. महाराष्ट्र नवनिर्माण सेना ही असली कारस्थानं कधीही यशस्वी होऊ देणार नाही.’
‘तंत्रज्ञांपासून कलाकारांपर्यंत कुणीही घाबरायची गरज नाही, कारण राजसाहेबांची मनसे सदैव तुमच्या पाठीशी आहे आणि यापुढेही राहणार, हा आमचा शब्द आहे,’ असंही खोपकर यांनी पुढं म्हटलं आहे.
आणखी वाचा:
Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times
