अभिनेते मिथुन चक्रवर्ती यांच्या मुलाविरोधात गुन्हा

आधी ‘मी टू’ आणि आता ड्रग्ज कनेक्शनमुळे बॉलिवूड चर्चेत असतानाच, आता अभिनेता यांचा मुलगा आणि त्यांच्या पत्नीच्या अडचणी वाढल्या आहेत. महाक्षय उर्फ मेमो आणि मिथुनच्या पत्नीविरुद्ध ओशिवरा पोलिस ठाण्यात दाखल करण्यात आला आहे. लग्नाचे आमिष दाखवून बलात्कार, गर्भपात केल्याचा आरोप महाक्षय याच्यावर, तर धमकावल्याचा आरोप मिथुनच्या पत्नीवर आहे.

मिथुन चक्रवर्ती यांचा मुलगा महाक्षय आणि आणि पीडित तरुणी यांच्यामध्ये २०१५ पासून प्रेम संबंध होते. याच प्रेमसंबंधात असताना, महाक्षय याने लग्न करण्याचे आश्वासन दिले होते. याचदरम्यान त्याने नवीन फ्लॅट पाहण्यासाठी बोलवले आणि सॉफ्ट ड्रिंगमधून नेशेच्या गोळ्या देऊन बलात्कार केल्याचा आरोप पीडितेने तक्रारीत केला आहे. इतकच नाही तर लग्नाचे आमिष दाखवून तिची फसवणूक केली. वारंवार शारीरिक संबंध ठेवले त्यातून गर्भवती राहिल्यानंतर त्याने आणि त्याच्या आईने गर्भपातासाठी धमकावले. मात्र, गर्भपात करण्यास नकार देताच महाक्षयने काही गोळ्या खाण्यास दिल्या. या गोळ्या खाल्ल्यामुळे गर्भपात झाल्याचा आरोप करीत तरुणीने ओशिवरा पोलिस ठाण्यात तक्रार केली. या तक्रारीवरून ओशिवरा पोलिसांनी महाक्षय आणि त्याच्या आईविरोधात बलात्कार, फसवणूक, गर्भपात आणि धमकाविल्याप्रकरणी गुन्हा दाखल केला आहे.

दरम्यान, या प्रकारानंतर तरुणी दिल्ली येथे भावाकडे राहण्यास गेली होती. भावाला सर्व हकीकत सांगितल्यानंतर त्यांनी दिल्लीतील रोहिणी न्यायालयात याप्रकरणी न्याय मागण्यासाठी याचिका दाखल केली. याप्रकरणी न्यायालयाकडून प्राथमिक पुराव्यांच्या आधारे एफआयआर दाखल करून चौकशीचे आदेश दिले आहेत. तसेच गुन्हा घडला त्या ठिकाणी तक्रार करण्याच्या सूचना या तरुणीला देण्यात आल्या होत्या. त्यानुसार तिच्या तक्रारीवरून पोलिसांनी कारवाई केली.