खंडवाः मध्य प्रदेशातील २८ विधानसभा मतदारसंघांच्या पोटनिवडणुकीसाठी राजकीय पक्षांच्या वरिष्ठ नेत्यांनी प्रचाराचा धडाका सुरू केला आहे. खंडवा जिल्ह्यातील मंधाता विधानसभा मतदारसंघाच्या पोटनिवडणुकीसाठी अशाच एका जाहीर प्रचारसभेत एका झाले. आता यावरून मध्य प्रदेशात राजकारण तापलं आहे. यासभेत पक्षाच्या उमेदवारासाठी भाजप नेते ज्योतिरादित्य शिंदे हे पोहोचले होते.

मांधाता विधानसभा मतदारसंघाच्या पोटनिवडणुकीत भाजपचे स्टार प्रचारक ज्योतिरादित्य शिंदे हे रविवारी निवडणूक प्रचारसभेला संबोधित करण्यासाठी आले. शिंदे येण्यापूर्वी स्थानिक नेत्यांची भाषणं सुरू होती. यादरम्यान, पंधाना येथील भाजपचे आमदार राम दांगोरे भाषण देत असताना तिथे उपस्थित असलेले ८० वर्षीय शेतकरी जीवनसिंह यांचे निधन झाले.

शेतकऱ्याच्या निधनानंतरही भाषण सुरूच

शेतकऱ्याच्या निधनानंतर जवळच्या खुर्च्यांवर बसलेले नागरिक पांगले. तरीही नेत्यांची भाषणं सुरूच होती. थोड्या वेळाने ज्योतिरादित्य शिंदे देखील जाहीर सभेत पोहोचले. पण त्यांचे आगमन होण्यापूर्वीच शेतकऱ्याचा मृतदेह सभेतून हलवण्यात आला होता. ज्योतिरादित्य शिंदे यांना शेतकर्‍याच्या निधनाची माहिती मिळाली. यावेळी शिंदे यांनी शेतकऱ्याला श्रद्धांजली वाहून एक मिनिट मौन पाळलं आणि त्यानंतर भाषणाला सुरवात केली.

जीवन सिंह हे देखील भाजपाचे जुने कार्यकर्ते असल्याचं सांगितलं जातंय. पण करोना संसर्गामुळे गर्दीच्या ठिकाणी ज्येष्ठ आणि वृद्ध नागरिकांना जाण्यास मनाई आहे. मग त्यांना सभेत येण्याची परवानगी कशी काय मिळाली? असा प्रश्न उपस्थित केला जातोय.

काँग्रेसचा ज्योतिरादित्यांवर निशाणा

ज्योतिरादित्य शिंदे यांच्या सभेत शेतकऱ्याचे निधन होऊनही दुर्लक्ष करून सभा सुरू ठेवल्याचा आरोप कॉंग्रेसने केला आहे. शेतकर्‍याच्या निधनानंतरही जाहीर सभा का सुरू ठेवण्यात आली? असा प्रश्न करत कॉंग्रेसने भाजपवर निशाणा साधला आहे.

मध्य प्रदेश कॉंग्रेसने यासंदर्भात ट्विट केलं आहे. ‘भाजपच्या कार्यक्रमात शेतकऱ्याचे निधन होऊनही नेत्यांची भाषणबाजी सुरूच होती. जाहीरसभेत शेतकऱ्याचे निधन होऊनही भाजप नेत्यांनी कार्यक्रम थांबवला नाही. शेतकऱ्याचा मृतदेह पडून होत आणि निर्लज्ज भाजप नेते टाळ्या वाजतवत होते. शिवराजसिंह चौहान साहेब जनतेला नाही पण देवाची तरी भीती बाळगा’, असं ट्विट करत काँग्रेसने भाजपवर हल्लाबोल केला आहे.

Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times

LEAVE A REPLY

Please enter your comment!
Please enter your name here