रात्री घरात सगळे झोपले होते, अचानक बेपत्ता झाली २ वर्षांची मुलगी

म. टा. वृत्तसेवा, धुळे: तालुक्यातील निमगूळ गावातील दोन वर्षीय बालिका अचानक बेपत्ता झाल्याची घटना घडली होती. याप्रकरणी अज्ञात व्यक्तीविरुद्ध तालुका पोलिस ठाण्यात अपहरणाचा गुन्हा दाखल करण्यात आला. बालिकेचा शोध सुरू असताना तिचा मृतदेह विहिरीत आढळल्याने गावात खळबळ उडाली आहे. घरात झोपलेली बालिका विहिरीत गेली कशी? याबाबत तर्कविर्तक लावले जात असून, शवविच्छेदन अहवालानंतर यासंदर्भात उलगडा होवू शकणार असल्याचे पोलिसांनी सांगितले आहे.

तालुक्यातील निमगूळ गावात राहणारे प्रवीण रामराव सैंदाणे-माळी हे कुटुंबियांसह (दि.१७) रोजी रात्री घरात झोपले असताना रात्री ९.३० ते रात्री १२.३० वाजेदरम्यान त्यांची दोन वर्षीय मुलगी प्राची प्रवीण सैंदोण-माळी ही अचानक बेपत्ता झाली. घराच्या दरवाजाला दोरीने बांधलेली खाट आडवी लावलेली होती. ही खाट सरकवून अज्ञात व्यक्तीने घरात प्रवेश केला व प्राचीचे अपहरण केले.

याप्रकरणी प्रवीण सैंदाणे यांनी तालुका पोलिस ठाण्यात दिलेल्या फिर्यादीवरुन अज्ञात व्यक्तीविरुद्ध गुन्हा दाखल करण्यात आला आहे. तसेच ठसे तज्ञ व श्वान पथकालाही पाचारण करण्यात आले व अपह्रत बालिकेचा परिसरात शोध घेतला. मात्र, ती मिळून आली नाही. दरम्यान, या बालिकेचा (दि.१८) रोजी सकाळी परिसरातील एका विहिरीत मृतदेह पाण्यात तरंगतांना आढळून आला. पोलिसांनी ग्रामस्थांच्या मदतीने बालिकेला बाहेर काढून मृतदेह जिल्हा रुग्णालयातील शवागारात रवाना केला असून, शवविच्छेदन अहवाल प्राप्त झाल्यानंतर या घटनेमागील उलगडा होवू शकेल, अशी माहिती निरीक्षक दिलीप गांगुर्डे यांनी दिली आहे.