प्रत्येक सामन्यानंतर दोन्ही संघांचे कर्णधार हे पारितोषिक वितरण समारंभाला येतात. पण रविवारी झालेल्या सामन्यानंतर मुंबईचा कर्णधार रोहित शर्मा हा पारितोषिक वितरण समारंभाला आला नाही. रोहितच्याऐवजी पोलार्ड हा पारितोषिक वितरण समारंभाला आला होता. त्यावेळी पोलार्डला रोहितबाबत प्रश्न विचारण्यात आला. त्यावेळी पोलार्ड म्हणाला की, ” या सामन्यानंतर रोहित शर्माची तब्येत बिघडली आहे. तो थोडासा आजारी पडला आहे. त्यामुळेच मी पारितोषिक वितरण समारंभाला आलो आहे. पण रोहित लवकरच बरा होईल, अशी आम्हा सर्वांना आशा आहे.”
मुंबई इंडियन्स आणि किंग्स इलेव्हन पंजाब यांच्यातील आजचा सामना थरारक असाच झाला. हा सामना सुपर ओव्हरमध्येही बरोबरीत असल्याचे पाहायला मिळाले. त्यामुळे पुन्हा दुसरी सुपर ओव्हर खेळवण्यात आली. दुसऱ्या सुपर ओव्हरमध्ये मुंबईची प्रथम फलंदाजी होती. मुंबईला यावेळी ११ धावा करता आल्या. त्यामुळे विजयासाठी पंजाबपुढे १२ धावांचे आव्हान होते. पंजाबला हे आव्हान यशस्वीरीत्या पेलवून दाखवले आणि त्यांनी मुंबईवर एकही विकेट न गमावता विजय मिळवला.
पहिल्या सुपर ओव्हरमध्ये मुंबईची प्रथम गोलंदाजी होती. मुंबईच्या जसप्रीत बुमराने यावेळी सुपर ओव्हरमध्ये भेदक मारा केला आणि त्यामुळे पंजाबचा एक फलंदाज गमावून पाच धावा करता आल्या. या आव्हानाचा पाठलाग करताना मुंबईच्या फलंदाजांनाही पाच धावाच करता आल्या. त्यामुळे सुपर ओव्हरमध्ये हा सामना बरोबरी झाला आणि दुसरी सुपर ओव्हर खेळवण्यात आली.
मुंबई इंडियन्स आणि पंजाब यांच्यातील सामना चांगलाच थरारक झाला आणि सुपर ओव्हरमध्ये गेला. कारण मुंबईने पंजाबपुढे यावेळी विजयासाठी १७७ धावांचे आव्हान ठेवले होते. किंग्स इलेव्हन पंजाबला फलंदाजी करताना यावेळई मुंबई एवढ्याच १७६ धावा करता आल्या आणि सामना सुपर ओव्हरमध्ये गेला. मुंबईच्या या आव्हानाचा पाठलाग करताना पंजाबचा कर्णधार लोकेश राहुलने अर्धशतकी खेळी साकारली होती. पण बुमराने त्याचा काटा काढला आणि संघाच्या विजयात मोलाचा वाटा उचलला. पण त्यानंतर ख्रिस जॉर्डन आणि दीपक हुडा यांनी दमदार फलंदाजी केली आणि आव्हान जीवंत ठेवले होते. अखेरच्या चेंडूवर दोन धावा हव्या असताना पंजाबला एकच धाव घेता आली आणि सामना सुपर ओव्हरमध्ये गेला होता.
Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times
