चेन्नईच्या १२६ धावांच्या माफक आव्हानाचा सामना करताना राजस्थानच्या संघाला चांगली सुरुवात करता आली नाही. चेन्नईच्या दीपक चहर आणि जोश हेझलवूड या दोघांनी आपल्या पहिल्या स्पेलमध्ये भेदक मारा केला. राजस्थानला यावेळी पहिल्या पाच षटकांमध्ये आपले तीन फलंदाज गमवावे लागले होते.
पहिल्या पाच षटकांमध्ये राजस्थानची ३ बाद २८ अशी धावसंख्या झाली होती. पण त्यानंतर कर्णधार स्टीव्हन स्मिथ आणि जोस बटलर यांची जोडी चांगलीच जमलेली पाहायला मिळाली. या दोघांनी यावेळी मोठा भागीदारी रचली आणि त्यामुळेच राजस्थानचा विजय दृष्टीपथामध्ये आला होता. यावेळी स्मिथ सावध खेळत असला तरी बटलरने यावेळी चेन्नईच्या गोलंदाजांचा चांगलाच समाचार घेतला. बटलरची खेळी या सामन्यात निर्णायक ठरली. कारण त्याच्या धडाकेबाज खेळीच्या जोरावर राजस्थानला या सामन्यात विजय मिळवता आला.
राजस्थान रॉयल्सविरुद्धच्या सामन्यात चेन्नईच्या फलंदजांना यावेळी चांगला सूर गवसल्याचे पाहायला मिळाले नाही. याला फक्त अपवाद ठरला तो अष्टपैलू रवींद्र जडेजा. या सामन्यात जडेजाने अखेरच्या षटकांमध्ये धडाकेबाज फलंदाजी केली. त्यामुळेच चेन्नईला या सामन्यात राजस्थानपुढे १२६ अशी सन्मानजनक धावसंख्या उभारता आली. जडेजाने यावेळी चार चौकारांच्या जोरावर नाबाद ३५ धावांची खेळी साकारली
चेन्नईने या सामन्यात नाणेफेक जिंकली आणि प्रथम फलंदाजी करण्याचा निर्णय घेतला. पण या सामन्यात चेन्नईला चांगली सुरुवात नाही मिळाली. कारण फॅफ ड्यू प्लेसिस आणि शेन वॉटसन हे फॉर्मात असलेले फलंदाज यावेळी लवकर बाद झाले. पण सॅम करनने यावेळी थोडी चांगली फटकेबाजी केलेली पाहायला मिळाली. सॅमने यावेळी २२ धावा केल्या.
Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times
