काय सांगता? पोलिस स्टेशनसमोरचा जप्त ट्रक घेऊन चोरटा झाला पसार

नागपूर: लकडगंज पोलिस स्टेशनसमोर झाला. ही घटना रविवारी सकाळी ६ वाजताच्या सुमारास घडली. या घटनेने पोलिस विभागात प्रचंड खळबळ उडाली आहे. विशेष म्हणजे याच ट्रक चोरी प्रकरणात चोरट्याला अटक करण्यात आली होती. जामिनावर सुटताच त्याने पुन्हा हाच ट्रक चोरी केला. पोलिस स्टेशनसमोर उभा असलेला जप्त ट्रक चोरी जाण्याची शहर पोलिस दलाच्या इतिहासीतील ही पहिलीच घटना होय. संजय गोविंदराव ढोणे (वय ५२, रा.झिंगाबाई टाकळी),असे चोरट्याचे नाव आहे.

स्माल फॅक्टरी भागातील पुष्कर समाज भवनसमोर २० टन सळाखी असलेला सीजी-०४-जे-५०३७ या क्रमांकाचा ट्रक उभा होता. १० ऑक्टोबरला सळाखीसह ट्रक घेऊन ढोणे पसार झाला. संतोष पांडे (३८) यांनी दिलेल्या तक्रारीवरून लकडगंज पोलिसांनी चोरीचा गुन्हा दाखल केला. गुन्हेशाखेच्या युनिट तीनने मोर्शी भागात ढोणे याला पकडले. ट्रक व ढोणे याला लकडगंज पोलिसांच्या स्वाधीन केले. लकडगंज पोलिसांनी ढोणे याची १५ ऑक्टोबरपर्यंत पोलिस कोठडी घेतली. त्यानंतर ढोणे याची जामिनावर सुटका झाली. ट्रक पोलिस स्टेशनसमोरच उभा होता. मालकाने तेथे चौकीदार तैनात केला. जामिनावर सुटका झाल्यानंतर ढोणे याने ट्रक चोरीचा कट आखला. सोमवारी सकाळी ६ वाजता तो लकडगंज पोलिस स्टेशनसमोर आला.

चौकीदाराला धमकी देत ट्रक घेऊन पसार झाला. चौकीदार धावत पोलिस स्टेशनमध्ये गेला. ढोणे हा ट्रक घेऊन पसार झाल्याची माहिती पोलिसांना दिली. पोलिसांनी लगेच ढोणे याचा शोध सुरू केला. वृत्त लिहिपर्यंत ढोणे व ट्रक पोलिसांना आढळला नाही.पोलिसांची चार पथके ढोणे व ट्रकचा शोध घेत आहेत.