दुबई : दिल्ली कॅपिटल्सच्या शिखर धवनने आज पंजाबच्या गोलंदाजांची यथेच्छ धुलाई केल्याचे पाहायला मिळाले. धवनने आजच्या सामन्यात आयपीएलमधील पाच हजार धावाही पूर्ण केल्या. त्याचबरोबर धवनने सलग दुसरे शतकही झळकावले. धवनने आजच्या सामन्यात ६१ चेंडूंत १२ चौकार आणि तीन षटकारांच्या जोरावर नाबाद १०६ धावांची वादळी खेळी साकारली. धवनच्या या धमाकेदार खेळीच्या जोरावर दिल्लीला पंजाबपुढे १६५ धावांचे आव्हान ठेवता आले. दिल्लीचे अन्य फलंदाज लवकर बाद होत असताना धवनने यावेळी धडाकेबाज फलंदाजी केली आणि पंजाबच्या गोलंदाजांच्या नाकीनऊ आणले.

दिल्लीने आजच्या सामन्यात नाणेफेक जिंकत प्रथम फलंदाजी करण्याचा निर्णय घेतला. पण दिल्लीची सुरुवात यावेळी चांगली झाली नाही. आतापर्यंत चांगली कामगिरी करता न आलेला पृथ्वी शॉ हा सात धावांवर बाद झाला. त्यामुळे दिल्लीला लवकरच पहिला धक्का बसला. पृथ्वी बाद झाल्यावर कर्णधार श्रेयस अय्यर आणि पुनरागमन करणाऱ्या रिषभ पंत या दोघांनाही लौकिकाला साजेशी कामगिरी करता आली नाही. कारण या दोघांनाही प्रत्येकी १४ धावांवरच समाधान मानावे लागले.

दिल्लीचे फलंदाज एका मागून एक बाद होत असले तरी सलामीवीर शिखर धवन यावेळी धडाकेबाज फलंदाजी करत असल्याचे पाहायला मिळाले. धवनने यावेळी पंजाबच्या गोलंदाजांचा चांगलाच समाचार घेतला. धवनने धमाकेदार फलंदाजी करत आयपीएलमधील आपल्या पाच हजार धावा यावेळी पूर्ण केल्याचे पाहायला मिळाले. गेल्या सामन्यात धवनने शतक झळकावत संघाला विजयही मिळवून दिला होता.

आयपीएल २०२० मधील आजची लढत दिल्ली कॅपिटल्स आणि किंग्स इलेव्हन पंजाब यांच्यात सुरु आहे. दुबईच्या आंतरराष्ट्रीय स्टेडियममध्ये ही लढत होईल. गेल्या सामन्यात दोन सुपर ओव्हर खेळून पंजाबने मुंबई इंडियन्स विरुद्ध विजय मिळवला होता. या विजयामुळे पंजाबचा आत्मविश्वास नक्कीच वाढला असेल. तर गुणतक्त्यात अव्वल स्थानी असलेल्या दिल्ली संघाला प्लेऑफचे तिकीट पक्के करण्यासाठी एका विजयाची गरज आहे. दिल्ली आणि पंजााब यांच्यात आतापर्यंत २५ लढती झाल्या आहेत त्यापैकी दिल्लीने ११ तर पंजाबने १४ मध्ये विजय मिळवला आहे. या दोन्ही संघात २० सप्टेंबर रोजी झालेला सामना टाय झाला होता. त्यात दिल्लीने सुपर ओव्हरमध्ये विजय मिळवला होता.

Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times

LEAVE A REPLY

Please enter your comment!
Please enter your name here