वाहनधारकांना दिलासा ; पेट्रोलियम कंपन्यांचा हा निर्णय ठरतोय फायदेशीर

मुंबई : जागतिक बाजारात कच्च्या तेलाचे भाव, चलन विनिमय दर आणि आयातीचा खर्च यासर्व आघाडींवर तडजोड करत पेट्रोलियम कंपन्यांनी इंधन दर जैसे थेच ठेवले आहेत. तब्बल १९ दिवस देशात पेट्रोल आणि स्थिर आहे. त्यामुळे पेट्रोलियम कंपन्यांचा इंधन दर स्थिर ठेवण्याचा हा निर्णय वाहनधारकांसाठी तूर्त दिलासादायक ठरत आहे.

अनलॉकचा पाचवा टप्पा देशात सुरु असून रस्त्यावरील वाहनांची रहदारी वाढली आहे. ऑगस्ट आणि सप्टेंबर या दोन महिन्यात पेट्रोल आणि डिझेलची मागणी वाढल्याचे दिसून आले आहे. त्यामुळे पेट्रोलियम कंपन्या देखील काही प्रमाणात सुखावल्या आहेत. इंधन मागणी वाढल्याने अर्थव्यवस्था सावरत असल्याचे बोलले जात आहे.

पेट्रोलियम कंपन्यांनी आज बुधवारी सलग १९ व्या दिवशी इंधन दर स्थिर ठेवले. त्यामुळे आज मुंबईत पेट्रोल ८७.७४ रुपये आणि डिझेल ७६.८६ रुपये प्रती लीटर कायम आहे. दिल्लीत आजचा पेट्रोलचा भाव ८१.०६ रुपये असून डिझेलचा भाव ७०.४६ रुपयांवर कायम आहे. चेन्नईत पेट्रोल ८४.१४ रुपये असून डिझेल ७५.९५ रुपये आहे. कोलकात्यात पेट्रोल ८२.५९ रुपये आहे. डिझेलचा भाव ७३.९९ रुपये प्रती लीटर झाले आहे.

अमेरिकेतील इक्विटीत वाढ आणि डॉलरचे मूल्य घसरल्याने डब्ल्यूटीआय क्रूडचे दर ४१.० डॉलर प्रति बॅरलवर स्थिरावले आहेत. खनिज तेलाचा सर्वात मोठा ग्राहक असलेल्या चीनच्या तेल आयातीत १७.५ टक्के वाढ झाली आहे. दररोज ११.८ दशलक्ष बॅरलने वाढ होत आहे. त्यामुळे करोना संकटातून चिनी अर्थव्यवस्था सावरल्याचे दिसून येत आहे. मात्र तेलाचा पुरवठा वाढल्याने किमतींवर परिणाम झाल्याचे कमॉडिटी विश्लेषकांचे म्हणणे आहे.एनर्जी इन्फॉर्मेशन अॅडमिनिस्ट्रेशनच्या अहवालानुसार पुढील महिन्यात ७ मोठ्या शेल फॉर्मेशनमधील तेल उत्पादनात १२१००० बॅरलची घट होण्याची शक्यता वर्तवण्यात आली आहे.

करोना आजाराचा प्रसार वाढतच असल्याने डब्ल्यूटीआय क्रूडचे दर काहीसे कमी म्हणजेच ०.१२ टक्क्यांनी कमी होत ४०.८ डॉलर प्रति औसांवर बंद झाले. लिबियन तेल उत्पादनात वाढ झाल्याने कच्च्या तेलाचे दर आणखी घसरले. अनेक युरोपियन देशांनी करोना विषाणूच्या धोकादायक प्रसारामुळे पुन्हा निर्बंध लादले. यामुळे तेलाच्या जागतिक मागणीत घट होऊन दरांमध्येही आणखी घसरण दिसून आली. अमेरिकेकडून अतिरिक्त मदतीच्या कराराच्या शक्यतेमुळे तेलाच्या दर घसरणीवर मर्यादा आल्या.

विदेशातील मागणी वाढल्याने सौदी अरेबियाच्या तेल निर्यातीत गेल्या काही महिन्यात वृद्धी दिसून आली. ऑगस्ट २०२० मध्ये तेलाची निर्यात दररोज ५.९७ दशलक्ष बॅरल एवढी नोंदली गेली. दरम्यान, विषाणूच्या दुसऱ्या लाटेमुळे कच्च्या तेलाच्या अर्थकारणावर आणखी परिणाम होऊ शकतो. तेलाचे दर आणखी कमी होऊ शकतात.